Aizawl-a MHIP General Headquarters Building thar sakna tur lungphum Chief Minister in a phum
Lungphum phumna puala hun hman ah Chief Minister Lalduhoma chuan MHIP ten General Headquarters Building thar, mawi leh changkang tak an nei mai tur chu a lawmpui thu sawiin, “MHIP leh kan tlawmngai pawl hrang hrangte hi kan Society thui phuitu, thangtharte kaihruaitu, kan SoIial institution pawimawhte in nih avangin sawrkar pawhin hmunhma tha leh zahawm tawk tak in neih hi tha kan ti a. Hun lo la awm zel tur ngaihtuahin nangmahni leh in hmunhma enkawlna tur pawh hi thawkchhuak thei ula, ngelnghet takin ding thei ula ka duh em em a ni,” a ti a. Tlawmngai pawl dangte tan pawh hma an la zel tih sawiin, “Thingsulthliah-a YMA ramah Convention Centre lian tham tak mai Swadesh Dharshan 2.0 atangin kan sa mek a. MUP Office pawh Vertical Extension kan tihsak dawn a, MSU hi Ainawn Veng-ah an Office hmun tur kan ruahmansak a. Hmeichhiate hamthatna lam bikah hian Working Women Hostel hi hmun hrang hrang pasarih ah kan sa mek a ni,” a ti bawk.
Chief Minister chuan MHIP chu kan ram-a tlawmngai pawl lian zinga hmeichhia leh naupangte tan bika ding awmchhun an nih bakah Sawrkar bultuma din an nih bawk avangin a theih ang anga tuamhlawm zui zel pawh thil tihawm tak a nih thu a sawi a, “The Mizo Marriage, Divorce and Inheritance of Property Act, 2014 pass a nih theih nan MHIP hian a thawh hlawk hle a. Hna in thawh that avangin kum 2016 khan Ministry of Women & Child Development, Govt. of India atangin Nari Shakti Puruskar lawmman in dawng bawk a. In hmalakna hrang hrangte hian nunau a thlamuan hle a ni,” a ti bawk a. Hmasawnna hna tha tak leh chak takin thawh zel nise an duh thu pawh sawiin, “Ruahmanna hrang hrang kan siam zingah Financial Advisory System hmangin Finance Department thuneihna tam tak chu Department Secretary-te kuta dah a ni a. SASCI phei hi chu kum tin a thar a rawn kal zel a, chung a thar lo kalte chu kan lo hman ve zel theih nan kum hlui-a kan thawhte kha kan inchinfel phawt zel a ngai si a. Kan thawhhona kan tihthat zual deuh deuh a tul dawn a ni,” a ti bawk.
Aizawl Treasury Square-a MHIP General Headquarters Building hlui hi April ni 20, 1993 atangin luah tan a ni a. Building thar hi a hmun ngaiah SASCI 2025-26 sum cheng nuai 3.70 senga sak tura ruahman a ni a. Nimin-a lungphum phumna hunah hian MHIP General Hqrs. President Lalliani pawhin an building hlui chu luah reng tlak a nih tak loh avangin a thar sakna tur an buaipui thu leh kawng tinrenga anmahni lo puitu Chief Minister Lalduhoma leh Women and Child Development Minister Lalrinpuii te bakah Sawrkar official-te chungah lawmthu a sawi a ni.