Rini AI Speech hmangtu an pung chak

Mizo tawng atanga tawng sawm lehlin theihna ‘Rini AI Speech’ chu khawvela ram 50 vela cheng mi sing li chuangin an hmang tawh.

Akashvani Aizawl News-in a kawmnaah Rini Speech AI CEO Dr. Maria Sailo chuan he thu hi sawiin, tawng chu hnam humhalhna pawimawh ber anga an ngaih avangin Rini Speech AI chu Mizo tawng chawisanna leh humhalhna atan an siam tih a sawi a. Internet-ah tawng lehlin theihna awm nual mah se Mizo tawng duh tawka dik leh tha taka letling thei a awm loh avangin nikum September thla atang khan an nupa in hma an la tan a, kumin May ni 21 khan Rini Speech AI chu hman theih turin an tlangzarh a, thla khat leh a chanve chhungin khawvela ram 50 vela cheng mi singli chuangin he app hi an install tawh tih a sawi a ni. 

Dr. Maria Sailo chuan tun dinhmunah Rini AI Speech hi Mizo tawng atangin tawng sawm-Japanese, Korean, Chinese, Thai, Hindi, English, Spanish, German, French thleng in a inlet thei a. Khawvel hmun hrang hranga Mizoten an hmang tangkai hle tih sawiin, he app hmangtu Mizoram pawna damlo leh damlo hruaitute bakah lehkha zir leh hnathawk te chu tawngah an buai tawh lo tih a sawi a. Missionary te pawhin rawngbawl nan te an hmang tangkai hle tih sawiin, hetiang taka Mizoten an lo tangkapui hi an lawm hle tih a sawi a ni.