Ramchhung hmundang rualin Serchhip-ah Zeng hri danna pek beihpui thlak a ni
Sawrkar laipui-a Ministry of Health & Family Welfare chuan rampum-ah Zeng hri danna pek beihpui, National Immunisation Day for Pulse Polio (IPPI) neih tura a ruahman angin Serchhip District-ah pawh Zeng hri panna pek beihpui hi nimin atang khan tan a ni a, Serchhip-ah chuan he beihpui thlakna hi Serchhip AOC Booth-ah neih niin Serchhip Addl. DC, Dorothy Muansangi chuan khuallian niin he beihpuithlakna hi a hawng a ni. He hunah hian Addl. DC chuan Serchhip District-a Zing hri danna pek beihpui thlak kalpui a ni chu lawmawm a tih thu sawiin, India ramah Zeng hri natna hi umbo tawh ah inngai mah ila kan thenawm ramah te he natna hi hmuh tur a awm leh zauh thin avangin inven reng kan ngai a, Sawrkar pawhin ngai pawimawhin naupang kum 5 hnuailam te hnena hri danna hi rampumah a la kalpui mek thu a sawi a. Health Department-a thawktu ten hri danna pek kawnga hma an lakna te chu a hmuhpui thu sawiin, lawmawm a tih thu a sawi a, “In hmalakna kawngah District Administration lamin puih theihna kan neih awm chi harsatna in neih ah puih che u kan inpeih reng a ni,” a ti bawk.
Tun tuma naupang kum 5 hnuailam te hnena Zeng hri danna pek beihpui thlak ah hian Serchhip District-a mi 5204 te hnenah hri danna hi pek tum a ni a, heng mite tan hian hri danna pekna tur hmun, Booth 82 siam niin July 1 atanga ni 3 thlengin hri danna hi pek a ni dawn a ni.
Aizawl-ah chuan Directorate of Health Services-ah Health & Family Welfare Minister Lalrinpuii chuan National Immunisation Day for Pulse Polio Programme hi hawngin India ram chu kum 2014 atang khan Zeng hri awm lohna, Polio-Free a lo puan tawh a nih thu sawiin, 'Polio Free State' kan nih reng theihna turin tan lak zel a pawimawh thu a sawi a. Prime Minister in a tlangzarh tawh HPV vaccine pek thatna kawngah Mizoram chu India ram pumah pathumna kan nih thu sawiin, hemi kawngah hian tan la zual a, pakhatna ni ngei thei tura tan la turin he huna kalkhawmte chu a fuih a ni.
Polio hi India ram bikah kum 2011 khan hmuh hnuhnun ber a ni tawh a, ram thenawm- Myanmar, Bangladesh leh Afghanistan-ah te he hri hi a la len avangin inven fimkhur a tul thu he hunah hian tarlan a ni a. India ramah June 28 chu National Immunisation Day (Pulse Polio Day) atan hman thin niin, kumin ah hian Mizoram District 11-ah hman mek niin kumin-a target chu naupang 102,830 niin an puala Immunization Booth 1,430 ruahman a nih thu tarlan a ni bawk.