MUHCS hmang thei zingah AB-PMJAY hmangtu tamin sum pawh an hmang tam ber

Mizoram Health Care Society chuan nimin khan Mizoram Journalist Association (MJA) te tan Mizoram Universal Health Care Scheme (MUHCS) chungchangah 'Sensitisation on MUHCS for MJA members' an buatsaih a, AB-PMJAY hmanga MUHCS zawmtu Golden Card nei te chu sum hmang hnem ber an nih thu an sawi.

Nimin-a he hun hman ah hian Resource Person pathum - Dr. K. Lalnghinglova, Chief Financial Officer, MSHCS; Dr. C. Vanlalduhsaka, Medical Officer, MSHCS leh Lalzirtira, Informatics Officer, MSHCS te chuan MUHCS chungchangah zirtirna an pe a. MUHCS hman dan chi hrang hrang bakah a kalphung te, damdawi In a awm kher lo ten an hman theih dan leh he Scheme in a huam loh natna te an tarlang a. MSHCS Chief Finanacial Officer Dr. K. Lalnghinglova, MFAS chuan MUHCS 1.0 ai chuan 2.0 zawmtu an pung tih sawiin, General Category-ah phei chuan a let aia tamin an pung niin a sawi a, kum kalta khan mi 20,198-in an zawm laiin kumin ah chuan mi 49,927 in a zawm thu sawiin, Sawrkar hnathawk leh Pensioner hi chu che reng a nih avangin figure dik tak hriat theih a nih loh thu leh a danglamna erawh a tam loh thu a sawi a, AB-PMJAY chu a hranpa a inziahluh ngai lo a nih avangin a danglam lo tih an sawi bawk.

Health Care enkawltute chuan an sum hmuhna an sawi ah State GIA chu an sum hnar lian ber a ni a, Sawrkar hnathawk thawhkhawm chuan dawtin PMJAY atanga an sum hmuh chu a pathumna a ni a, hemi bakah hian Enrolment Fee pensioner te thawh khawm leh Corpus Fund Interest te chu an pawisa hmuhna a nih thu an sawi a. State GIA tum hi 58% a nih laiin PMJAY te sum thawh hi 9% chiah a ni a, sawrkar hnathawkte tum hi 10% a ni.

Data atanga a lan danin MUHCS hmangtu 70% te hi AB-PMJAY hmangtu Golden Card nei an ni a, an Enrolment Fee hi central tum sak a ni a, Central hian chhungkaw khatah Rs. 1,052 a tum a, hemi a 10% hi State tum a ni thung a. Mizoram-in Golden Card a neih theih zat 2,16,000 chu Central hian 90% tum bawk mah se, Enrolment ti hi chhungkaw 2,22,943 an awm avangin chhungkaw 6,943 chu Mizoram sawrkarin MUCHS-ah hian enrolment kum tin a tum sak leh bawk a ni.

Kum 2025-2026 ah khan MUCHS atanga hamthatna dawngtu 68% chu AB-PMJAY hmangtute an ni a, Sawrkar hnathawk hi 12% an ni a, General Enrolment ti ho chu 16% niin Pensioner te 8% an ni bawk. Bill pekchhuah atangin AB-PMJAY hmangtute pawisa hman hi cheng vbc. 80.79 niin Sawrkar hnathawkte hman chu cheng vbc. 43.81 a ni a, General Category te sum hman chu cheng vbc. 37.48 niin pensioner te hman chu cheng vbc. 29.48 a ni. Hetihlai hian nimin khan MUHCS hnuaiah hian damlo enkawlna cheng vbc. 9.79 pekchhuah leh niin tun sawrkar kum ah cheng vbc. 47.64 pekchhuah a ni tawh a ni.