MISTIC leh NIF ten Tualchhung khawl siamchhuah sem
Mizoram-ah hian Zopa tualchher thiam (Grassroot innovator) kan tihte hi mi 50 chuang awmin, anni hian an hmanraw hmuhtheih leh tualchhung mamawh milin mipuite harsatna engemaw zat an lo sutkian sak tawh thin a, MISTIC hian Innovation Facility Centre leh Patent Information Centre kaltlangin Innovation lamah hian nasa taka hma lain NITI Aayog 2025 Report-ah hialte pawh IFC hi a lo lang ve tawh a. Nimin khan a tum thumna atan beneficiary 30 te hnena tualchhung Zopa tualchher thiamte khawl siamchhuah te hi semin heng te hi Ramdinmawia (Haulawng) siam Hmarcha chi leh a kawr thliarna te; Lalhruaitluanga (Serchhip) siam Changel channa khawl te; Lalbiakzuala Ralte (Luangmual) siam Kuhva kawrpui leh a thel faina leh Lalthafela (Kawnpui ) siamchhuah Kuhva thelfaina te a ni. Heng khawl te hi a thlawna semchhuah ni mah se a hmangtu turte leh NIF/MISTIC ten inremna ziakin an khawl dawn hi tangkai taka hmanga, a hun taka review/feedback pe tura intiamkamna siam a ni.
National Innovation Foundation (NIF) hi Department of Science and Technology, GoI hnuaia Autonomous Institution niin Innovation-in hma a sawn theihna tura India ram pum huapa hma latu a ni a. MISTIC hi Mizoram sawrkar hnuaia Science, Technology leh Innovation lamin hma a sawn theihna tur Central rawtna anga Mizoram sawrkarin a din a ni thung a. Nimin-a hun hman hi MISTIC-a Member Secretary leh Chief Scientific Officer Er. K. Lalrammuana chuan kaihruaiin khawl dawngtu te chu an khawl dawnte tangkai taka hmang tur leh feedback/review pawh a hun taka pe turin a ngen bawk a ni.