MIGAHTA ten sawrkar-a thilphut nawr nan nimin atang khan a huho in chawlh an la

Mizoram Govt. Adhoc Aided High School Teacher’s Association (MIGAHTA) chuan sawrkar-a an thilphut nawrna atan nimin atang khan a huho in chawlh an la a, Vawiin pawh hian chawlh hi lak chhunzawm an tum thu an sawi a ni.

MIGAHTA hian an School te Provincialised tura sawrkar an phûtna tihhlawhtlin a nih theih nan leh dinhmun hniam zawka dahna tur dan thar an duh loh lantir nan nimin khan a huho in chawlh an la a, hei hi an thilphut tih hlawhtlin ngiat nana lungawi lohna an lantir ni 5-na a ni a. MIGAHTA hian thuchhuah siamin, Mass Casual Leave hi Mizoram puma Adhoc Aided High School 90 chuanga thawktute an kalpui tih sawiin, Adhoc High School zawng zawng khar vek niin an thilphut a hlawhtling lo a nih chuan Vawiin lamah pawh a huho-a chawlh lak chhunzawm an tum thu an sawi a. Mass Casual Leave lak avanga a nghawng tur zirlaite leh mipuite hnenah hriatthiamna an dil rualin, an thlawpna pawh an ngen nghal a; Adhoc High School te hi kum 30 kalta a khawtlangin harsatna tam tak kara an lo din, Lumpsum atanga Provincialise pawh ni vek tawh, chumi hnua ho lam taka provincialise atanga paih thlak leh te an nih thu an tarlang bawk.

MIGAHTA hian an ruahman dan chuan an thilphutte hi sawrkarin a tihlawhtling lo zel a nih chuan tun thla ni 29 leh 30 khian Aizawl-ah Peaceful Sit-in Demonstration an nei dawn a, an hmalakna ten sawrkar a ko eih zo lo a nih chuan a aia na zawka hmalak zel an tum thu an sawi bawk a ni. 

Hetihlai hian School Education Minister hlui leh MNF Vice President, Lalchhandama Ralte chuan nimin-a MNF Chhung Inkhawm neih ah School Education hnuaia upgradation chungchang sawiin, “School tam takin Signboard thar nen lawm taka hma an lak laiin, sawrkarin a cancel hi a pawi kan ti,” a ti a. Sawrkar kalta in School thenkhat dinhmun sang zawka a dah chu kum 2023 inthlan denchhena tia an puhna chu a dik lo hle tih sawiin, “School upgradation kha kum 2021 chho-ah kan kalpui daih tawh a ni. An ti ve thei lo a nih chuan, ‘Kan ti thei lo,’ ti mai se. Keini chuan kan arkhawdim dai ve lo. MNF chuan School upgradation kan tih kha tha kan la ti reng. Kan lo sawrkar leh a nih chuan a theih ang angin kan kalpui leh dawn,” a ti bawk.