Larsap-in ‘MRB 43rd Annual Report’ a tlangzarh
Lok Bhavan-a MRB 43rd Annual Report tlangzarhna hunah hian Larsap General (Dr) Vijay Kumar Singh chuan Mizoram Rural Bank (MRB) in kum dang zawng aia hmaa Annual Report an peihfel leh hmasawnna hrang hrang hmuh theiha a awm chu lawmawm a tih thu sawiin, an thlen chinah duh tawk mai lova tun aia hmasawn lehzual tura thawk chhunzawm zel turin a fuih a. Mizoram thingtlang kil tin dapchhuaka awm MRB chu thingtlang sum leh pai dinhmun innghahna pawimawh tak an an nih thu sawiin, mipui tana duan Central Scheme hrang hrangte, Education Loan leh Social Security Scheme tam zawk pekchhuah leh tihhlawhtlin kawngah theihtawp chhuah turin a chah a ni.
Larsap General (Dr) Vijay Kumar Singh chuan Mizoram chu Chhiah luh tlemna, Revenue Deficit State a nih avangin Chhiah lakluh kawngah tanlak a tul thu leh thingtlang sum leh pai dinhmun (rural economy) tihhmasawn chu hemi atana pawimawh tak a nih thu a sawi a. Loneitute tharchhuah hlawk zawka hralha sum lakluh tipung turin Market Linkage tha ruahman a tul thu sawiin, heng bakah hian inzirtirna neih tam a tul thu a sawi a. MRB hotute chu Credit Deposit (CD) Ratio tha leh NPA awm lo siam tura tan la chhunzawm zel tura chahin, NABARD leh MRB te chu hmasawnna ruhrel tha zawk siam tura theihtawp chhuah turin a fuih a. Tun aia tha zawk ni tura inenfiah thin tur leh an hnathawhte puangzar tam tura chahin, hlawhtlinna tam zawk hmu turin duhsakna a hlan a ni.
Nimin-a he hun hman hi Mizoram Rural Bank (MRB) RSETI Director, C. Laldampuia chuan kaihruaiin Saibal Kanti Roy, General Manager, Network-I chuan inlawmna thu a sawi a. MRB Chairman Sheryl L. Vanchhong hnen atangin Annual Report leh hlawhtlinna mellung pawimawh tlangpui ngaihthlak a ni a, NABARD Aizawl-a General Manager, Bhaskar Manta pawhin thu sawiin, loneitu rethei tak takte, hmeichhia leh Self Help Group-te tanpui turin MRB nen thawhhona tha tak an neih thu a sawi a. MRB hmalakna leh hlawhtlinnate fakawm a tih thu sawiin, NABARD chu MRB leh Mizoram mipuite tana thawk turin a inhuam reng tih a sawi bawk a ni.
Mizoram Rural Bank hi Scheduled Bank niin Mizoram-a Bank inzarpharh zau ber a ni a, District tinah inzarpharhin Branch 106 leh thawktu 491 a nei a. Bank Branch awm lohna hmunah Business Correspondent (BC) dah zelin BC 350 chuang a awm mek a. Kolasib-ah Mizoram Rural Bank RSETI a awm bawk a ni.