HIV-ah India dinhmun let 15 zetin Mizoram a sang zawk

Mizoram chu India ram pumpui HIV dinhmun aiin a let 15 zet in a sang zawk nia tarlan niin Mizoram-a HIV kai thar hmuhchhuah chu kumtin an tlem ve hret hret tih MSACS hotute chuan an sawi.

Aizawl District-a HIV/AIDS dona kawnga chak zawka hmalak dan tur inrawnkhawmna chu nimin khan Aizawl DC Pisapui Hall-ah Addl. DC, Zoramsiama Hmar hovin neih a ni a, he hunah hian National AIDS Control Organization (NACO)-a National Consultant, Pradeep Kumar chuan HIV chungchanga Mizoram dinhmun zirchianna tarlangin, Mizoram chu India ram pumpui HIV dinhmun aiin a let 15 zet in a sang zawk a, kum 2025-2026 chhunga Mizoram-a HIV hrik pai hmuhchhuah zingah Aizawl District a mi an tam ber a, Aizawl District chu a bupui ber a nih avangin nasa taka tanlak a ngaihthu a sawi bawk.

He hunah hian Mizoram State AIDS Control Society (MSACS) Project Director, Dr. Jane Ralte pawhin chuan MSACS a thawktute bakah Kohhran leh khawtlang in theihtawp chhuaha HIV dona kawnga hma an lakna chuan rah tha a chhuah mek tih sawiin, Mizoram-a HIV kai thar hmuhchhuah chu kumtin a tlem ve hret hret tih a tarlang a, HIV dona kawngah tha thlah theih a nih loh thu leh HIV kai thar awm lo tura nasa zawka beih chhunzawm zel a tul thu a sawi bawk.

Inrawnkhawmna ah hian HIV chuan thliar bik neilovin mipui nawlpui-ah a luh tawh thu leh mipui mimir-ah nasa taka a darh kual tawh thu tarlan a ni a, HIV hrik pai hmuhchhuah zinga 76.3 % zette chu sex atanga kai an nih thu pawh tarlan a ni bawk.