District Level Red Ribbon Quiz Competition neih a ni
District AIDS Prevention & Control Committee leh Mizoram State AIDS Control Society te buatsaih he Quiz Competition hi School Level a neih a nih hnuah nimin khan District huap intihsiakna hi neih a ni a, School 10 atanga mi pahnih theuh telin Govt. JM High School, Serchhip chu pakhatna an ni a, thla thar August thlaa State Level intihsiakna ah Serchhip District aiawhin an tel dawn a, Govt. Khawlailung High School chu pahnihna niin Govt PCR High School, Serchhip chu pathumna an ni a, Govt. High School, Serchhip in Consolation Prize an dawng bawk a ni.
Nimin-a Quiz Competition hi Bawrhsap Paul L. Khuma chuan telpuiin he intihsiakna in AIDS chungchanga hriatna a pek belhte chu tangkai taka an hman ngei a duh thu sawiin, “Hriatna hi kan hman si loh chuan finna a tel thin lo a ni,” a ti a. Zirlaiten an theihna hrechiangin, hun tha an neihte tha taka hmang turin a chah a ni. He hunah hian District AIDS Control Officer, Dr. Lallawmkimi Chhakchhuak chuan Quiz intihsiakna buatsaih a nih dante sawiin, Intihsiakna ah tawp mai lova HIV chungchanga mipuiin hriatna zau zawk an lo dawn theih nan midang zirtirtu ni theuh turin zirlai naupangte chu a chah a ni.