District Hospital Champhai-ah CT Scan khawl hawng
District Hospital, Champhai Doctors Lounge-a CT Scan khawl thar hawnna hunah hian Champhai North Bialtu MLA chuan CT Scan khawl bun a nih theihna tura tha thawh zawng zawngte an hriat reng thu leh sawrkar kal tawhte leh Bialtu MLA lo ni tawhte hnathawh an chhunzawma hman theiha peihfel a ni ta chu District tana hmasawnna nasa tak a ni tih a sawi a, he hmasawnna thar hi Champhai mipui chauh ni lo, a chhehvel Bial hrang hrang mipuite tana khawl changkang tak mipuite tana chhawpchhuah a ni ta hi lawmawm a tih thu a sawi bawk.
Sawrkar in District Headquarters an ngaih pawimawh thu leh Champhai District pawhin sawrkar duhsakna a dawn nasat thu Advisor to CM (Technical) Er. H. Ginzalala chuan sawiin, thawktu indaihlohna pawh a theih ang anga hnawh-khat tura hma an la mek a ni tih a sawi a. Champhai khawpui chhung cheina atana sum cheng nuai 215 ruahman a ni tih sawiin, zirna in tun aia hma a sawn theihna turin ruahhmanna siam mek a nih thu a sawi bawk.
Nimin-a District Hospital, Champhai-a CT Scan khawl thar hawnna hun hi Medical Superintendent Dr. Zatluanga chuan kaihruaiin Champhai leh a chhehvel mipuite tana he khawl pawimawh tak mai bunfel a ni ta chu lawmawm a tih thu a sawi a, damlo ten phai leh Aizawl thleng kher lova he hna an thawk thei tawh tur hi hmasawnna nasa tak a nih thu a tarlang a. Anni bakah hian Dr. Lalnuntluanga, In-charge Radio-diagnosis Department leh Dr. PC. Lalawmpuia, Senior Specialist te pawhin thu an sawi a. Hun hman a nih zawh hnu hian he huna tel te hian khawl thar hi an enfiah zui bawk a ni.