Directorate of Economics & Statistics building sak hna thawktu an phu tawka hrem an phut

ZPM Thalai chuan Aizawl-a Directorate of Economics & Statistics Building chu ZPM sawrkarin thuam tha lo se chuan tlusawp thei a nih thu leh a sak hna thawktu NECS chu an phu tawka hrem ngei nise an duh thu an sawi.

ZPM Thalai hruaitute chuan nimin khan Aizawl Press Club-ah thuthar thehdarhtute kawmin he hunah hian ZPM Thalai Vice President Issac Lallungawia Rokhum chuan, Mizoram State Project Monitoring Committee (MSPMC) Inspection Report tarlan danin, Directorate of Economics & Statistics Building hi a him tawk lo tih MNF Sawrkar lai, kum 2022 khan hmuhchhuah a lo ni tawh tih sawiin, PWD Quality Control Division-in Non-Destructive Test (Rebound hammer) hmanga an enfiahnaah concrete chak zawng M20 grade tling turah M10 pawh a phak lo tih finfiah a nih thu a sawi a. MSPMC leh Accountant General (AG) Audit Report zirchianna ah, dan leh inkaihhruaina zawm miah lovin cheng vbc. 6 senga Building sak hna hi NECS hnenah pek a ni tih tarlan a ni a. Third Party Monitoring leh Measurement (tehna) pawh la miah lovin bill hi pekchhuah tawp a ni chu eirukna lian takah an ngai tih an sawi.

ZPM Thalai hruaitute chuan DPR leh Drawing-te dil mah se, Economics & Statistics Department in hetiang document pawimawh hi an nei lo nia sawiin, mak an tih thu an sawi a. MSPMC chuan thil diklo finfiahna (evidence) hmuh tur a awm kim tawh avangin Contractor pawh dan anga hremna lek ngei a tul thu sawrkarah a thlen tih sawiin, ZPM Thalai chuan hei hi zaa za-in an thlawp thu leh ram leh mipui nunna tana hlauhawm khawpa hna thalo thawktu leh eirukna liana inhnamhnawih te chu an phu tawk hremna pe ngei turin sawrkar an phut thu an sawi a ni.