Dan hnuaiah Wine leh Fruit Beer-te a zawrh theih tawh dawn tih Agriculture Minister in a sawi
Agriculture & Farmers' Welfare Department changtu Minister PC. Vanlalruata hian nimin khan Champhai Winery tlawhin thawktute nen hmalak dan tur leh sawrkar hmachhawp te an sawiho a, he hunah hian Minister PC. Vanlalruata chuan Sawrkarin kuthnathawktute hmakhua ngaiin Wine Rule siamthat a nih thu leh Dan hnuaiah Wine leh Fruit Beer-te a zawrh theih tawh dawn tih a sawi a. “Champhai Winery hi kan rama Winery Processing lian ber pawl a ni a, kuthnathawktute pawhin an chhawr tangkaiin hetianga an thlai tharchhuah atanga Wine siamchhuah a ni hi Agriculture Minister ka nihna ang pawhin ka lawm hle a ni,” tiin Thlai dang atang pawha siamchhuah zel theih nise a duhawm hle tih a sawi a. “Hetiang Industry lian hi awm belh zel sela, Grape atang chauh ni lo thlai dang atang pawha Wine siamchhuah theih dante pawh ngaihtuah zel tur a ni a, kuthawktu ten an thawhrim zar an zo zel theihna turin sawrkar chuan theihtawp a chhuah zel dawn a ni,” a ti bawk.
Agriculture Minister PC. Vanlalruata chuan tunhnai khan sawrkar laipui-a Ministry of Agriculture & Farmer Welfare hnuaia Market Intervention Scheme (MIS) atangin Mizoram Agriculture Marketing Board (MAMB) chuan Sawhthing atan Rs. 9,48,14,281/- an dawn thu leh MIS hnuai atang vek hian Champhai Winery hian Grape bik atan Rs. 3,68,84,297/- an dawng bawk tih sawiin, a lawmpui thu a sawi a. “Heng sum leh paite hi dik taka hman a nih chuan hmasawnna tluantling thlen thei a ni a, kuthnathawktuten an thawh zar an zo ngei theih nan sawrkar hnathawk tute pawhin ngaihtuahna tak tak an sen chhoh zel ka beisei a ni,” a ti bawk.
He hunah hian Champhai Winery a thawktute hian harsatna hrang hrang an tawhte Minister hnenah hian an lo thlen a, Minister chuan a theih ang anga lo bawhzui a tum thu a sawi a ni.