YMA Day Pual : YMA Day-ah eng ang rilru nge i put dawn?
YMA Day-ah eng ang rilru nge i put dawn?
Mizote zinga pawl lian ber leh páwl ropui bera kan chhål thin YMA chuan a dincham, YMA Day vawi 91-na chu Vawiin June 15, 2026 hian kan lo thleng leh dawn ta reng mai a. Hlim taka hmang tùrin duhsakna kan inhlàn hmasa a ni e.
Hetia hlim taka hmang túra kan induhsak rual hian YMA thiltum te, a dinchhante hre lo léka a phawvuak leh a heheu záwngin kan hmang ang tih erawh ka hlau hlel lo e! Kum 1935-a Zosap Pi Zaii hoa he pawl an din lai khán, Mizo thalaite hmakhua leh thatna tür thui tak dáwn chung leh Bible thu ang taka, 'thil tha ti atana siam kan nih' ang taka he pawl hi, thil tha ti túrin an lo din a ni tih hi i hre reng ang u.
‘He ni ropui kan lawm tùrah hian eng ang rilru nge kan put dawn?’ tih hi inzâwta inngaihtuah thar a tûl khawpin ka hria. Lawm hut hut, tih hut hut lam ringawt kan ngaihtuah ngawt chuan a fel lo ang. Tanpui ngai-mi rethei pachhia, hmeithai leh fahrahte tanpuia tuamhläwm thintu pawl a nihna te, Zonun Ze Mawi vawng nungtu a nihna te, Mizo nuna bet tlat tlawmngaihna te chawinungtu a nihna te, Kristian nun dân tha leh mawi nunpuia ngaisángtu a nihnate hi hre thar lehin chúng chuan YMA member-te rilru hi luah theuh thei se la a duhawm hle ang.
Tin, YMA dinchhan pawh hi kan hriat tel a, a taka kan nun chhuahpui a tûl hle mai. YMA Day hi 'Hunawl hman that' kan zir tharna leh a taka kan hman tanna ni ni thei se la. Thanpuii Pa (Pu J. Malsawma) chuan, ‘Lên mai mai te, tih mai mai te, sawi mai mai te, awm mai maite kan sim hma hi chuan Mizote hian kut kan dawh kumkhua dawn a nih hi,’ tiin a lo sawi (ziak) tawh a. Vawiin ah hian YMA member, thalai rual zingah hian 'awm mai mai thin' hi inchhiar ta ila, mang ti ang khawpin kan tam låwng maw? Awm mai mai, léng mai mai te hian hunawl an hman that a rinawm viau loh a ni. YMA member kan niha, 'awm mai mai' kan chin tlat chuan kan påwl dinchhan kan bawhchhia a, kan phatsan a ni tih i inhria ang u!
Zofate thatna tür ngaihtuah loa a ngaihtuahtute rèl lama dang näl leh kaiza tha chak kan nih paw'n påwl member nih hi kan tlin lo a, inhnükdäwk ngam tür pawh kan ni tho bawk, Tin, Kristian nun dân tha hi YMA member te hian kan ngaisáng tak tak em, tih te pawh kan inzawh a tûl hle.
YMA-a inhman hi a Kristian hle tih hi ka ngaihdàn rumrût a ni. Chanhaite leh riangvaite tanpui hi Isua Krista zirtirna nèn a inpersan lo mai ni loin a inhne rem thlap. Chutih rual chuan YMA-a inhmang tak, Kohhran leh Kohhran thalai páwl thiltihnaa lang duh miah lo pawh hi a YMA hlawi lo! Kristian nun dân tha ngaisángtu chuan Kohhran belh tlata Kohhran si renga awm hi a tih túr (duty) dik tak a ni. Kawng lehlamin sawi ta ila, Kohhrana inhmang tak, YMA thiltih leh hmaläkna hmu thlarau thei tlat lo, hmu khawvel tlat pawh, Kristian dan dik leh Kristian nun dàn mawi a ni chuang hauh lo bawk.
Thil pakhat ka'n belh leh hram duh chu : YMA hi páwl a nih angin kum tin kan inthlang thin. Hruaitu hlui chu hruaitu tharten an thlâk a tul cháng a awm fo. Hetih lai hian kum thar hruaitu inthlanna kan tlin täk loh avanga hruaitu tharte hmalákna thlawp tum tlat lo; YMA thiltihnaa hmel hmuh túr awm ngai ta miah lo ang chi hi YMA Branch leh YMA Group tin hian kan kawl ther fur lo maw? Inngaihtuah chian kan va'n ngai êm!
Tin, YMA hi páwl pakhat a ni a; hruaitute leh hruaitu nih tumte hian a chhúngah pawl pawl an siam hi a thiang lo! Political party ang maia inthlan dawna nominee-ten påwl påwl kan lo siam a nih chuan hruaitu ni tläkah inngai lul suh se! Zak hle záwk rawh se! Kan hruaitu ni mekte leh hruaitu nih tumte hian Vawiin, YMA Day-ah hian hêngte hi ngaihtuah tel mawih teh se.
YMA ti vula a pár zú chhúntír zël túr chuan YMA hruaitu mai ni lo, member tinte hian mawh kan phur theuh mai. He pawl ropui tak zahawmna vawngnung zèl tür chuan, YMA Day-ah tal hi chuan pawl thil tum te, a dinchhante rilru-ah vawng tharin, a taka hmangtu nih i tum theuh ang u.
YMA zël rawh se!