Raltlan te hnenah buhfai sem turin buaipui mek a ni

Central sawrkar-in Mizorama raltlan awmte tana cheng vbc. 5 hu buhfai a thlawna sem tur a rawn ruahman chu sem hna buaipui mek a ni.

Home Secretary Vanlalmawia’n Akashvani News Aizawl a hrilh danin District hrang hrang hian a thlawna buhfai sem tur hi an sem tan mek tawh turah a ngaih thu a sawi a. Siaha District Bawrhsap VL. Hruaizela Khiangte chuan kar kalta Ningani atanga sem tan tur khan ruahmanna an siam thu a sawi a. Lawngtlai District Bawrhsap Donny Lalruatsanga chuan Vawiin atanga sem tan an tum thu a sawi a. Kolasib District Bawrhsap H. Dolianbuaia chuan an District chu an la muan hret tur thu a sawi a. A bik takin Manipur atanga lo lutte hian haw an tintuah reng a, tunhnai-ah pawh Churachandpur-a an chhohna tur Bus an ruahman sak a, mahse an thulh leh niin an sawi a. Hei vang hian raltlan awm zat hi chhiar that leh phawt a ngai dawna a hriat thu a sawi a ni.

Sawrkar laipui ruahman cheng vbc. 5 hu buhfai hi Metric Tonne 1,291 chuang zet a ni a, District tin a raltlan awm zat a zirin sem a ni dawn a, Central sawrkar hian kum 2024 khan Mizoram-a awm raltlante hi cheng vbc. 5 hu buhfai a thlawnin a lo sem tawh bawk a ni. Home Department chhinchhiah danin Mizoram-ah hian Myanmar atanga raltlan mi 29,702 an awm mek a, Bangladesh atanga raltlan hi mi 1,671 leh Manipur atanga raltlan mi 7,344 an awm mek bawk a chhut a ni. Myanmar raltlan awm tamna ber chu Champhai District niin mi 12,083 awm anga chhinchhiah a ni a, buhfai hi quintal 4,460 ruahman a ni a. Raltlan awm tamna ber dawttu Lawngtlai District tan quintal 2,850 sem tura ruahman a ni bawk a. Lawngtlai District-ah hian Myanmar raltlan mi 6,328 leh Bangladesh raltlan mi 1,353 an awm mek a ni.

Raltlan te hnenah sem tur Buhfai hi Ministry of Consumer Affairs, Food and Public Distribution (MCAF&PD) in FCI kaltlangin Mizoram Supply Department hnenah a rawn thlen tawh a. District tina Supply Department Kudam-ah dah tawh niin, a khah hlawm avangin June ni 30 hma a sem vek hman tum a ni.