Kumin ah TB vei mi 1087 hmuhchhuah an ni tawh

Kumin chhungin Mizoram-ah Tuberculosis (TB) natna vei mi 1087 hmuhchhuah an ni tawh a, TB vanga thi mi 71 an awm tawh bawk.

Nimin khan State TB Forum thutkhawm chu National Health Mission (NHM) Director Dr. R. Lalchhuan-awma kaihhruaiin a Pisa-ah neih a ni a, he huna tarlan a nih danin kumin (2026) January atanga June thla thleng hian Mizoram-ah TB vei rinhlelh mi 61,246 enfiah ni tawhin TB vei mi 1087 hmuh an ni tawh a, TB vei hmuhchhuah zinga za zela 6.5, mi 68 te chu kum 14 hnuailam niin za zela 93.5, mi 977 te chu kum 14 chunglam an ni thung a, TB vei hmuhchhuah zinga 600 chu mipa niin midang 445 te chu hmeichhia an ni a, TB vei hmuh zingah Chuap TB vei 520 awmin hei hi TB vei zingah za zela 49 an ni a, Chuap pawn lam TB vei 538 awmin TB vei hmuchhuah atanga chhutin za zela 51 a ni thung a. TB dam har chi, MDR - TB vei mi 47 hmuh-chhuah niin  TB-HIV vei kawp mi 92 hmuhchhuah an ni bawk. Kumin chhung hian TB vei mi 71 boral tawhin za zela 86.49 te enkawl dam an ni tawh bawk a ni.

He thutkhawm ah hian State TB Officer leh Jt. Director (TB) Dr. Zochhuanawmi chuan Powerpoint presentation hmangin hnathawh dan hrang hrang a sawifiah a.TB damlo chhawmdawlna programme, Pradhan Mantri TB Mukt Bharat Abhiyaan - Nikshay Mitra Initiative kalpui mek a nih thu leh he hmalakna atan hian Minister, MLA leh Sawrkar Official ten Food Basket hmanga TB damlo an tanpui mek 103 an awm thu leh TB damlo Food Basket dawng mek zat 374 an awm thu a sawi. TB natna vei inenkawl zinga 28% vel chiahin Donor an nei tih a sawi bawk.

Hei bakah hian TB umbona atana Campaign kalpui mek, TB Mukt Bharat 100 Days campaign-ah khua leh vengah Screening runpui neih thin a nih thu tarlan niin TB veiah hian kum 15 leh kum 45 inkar an tam ber avangin screening neih turah thalai kal tam a tul thu tarlan a ni bawk.