Union MoS for Consumers Affairs in Khawzawl tlawh

Khawzawl District tlawha rawn zin Union Minister of State for Consumer Affairs, Food And Public Distribution Nimuben Jayantibhai Bambhaniya-i chuan Inrinni khan Chawngtlai khua tlawhin Handloom Training Centre leh PMAY-G hnuaia In sakte tlawhin SHG member-te nen an inkawm bawk.

Union Minister Nimuben Jayantibhai Bambhaniya-i hian Chawngtlai khuaa Handloom Training Centre-a thawktute leh zirlaite kawmin, an puantah mawi tak takte chu zau zawka pholan theih nise tha a tih thu a sawi a. PMAY-G hnuaia In sa zo tawh chhungkaw pahnih tlawhin, sawrkar Scheme hmang tangkaia In an din thei chu a lawmpui thu a sawi bawk.

Hei bakah hian Chawngtlai VC House-ah SHG member-te nen inkawmin mipuiin SHG thil siam chhuah (product) reng reng tha tura an rin theih nan thianghlim tak leh quality tha taka thil siam zel turin Union Minister hian a chah a. Sawrkar laipui chuan hmeichhia, thalai, loneitute leh mi harsa zawkte chawikanna leh tihhmasawn a ngaih pawimawhzia sawiin, sawrkarin hmeichhia te tana Scheme hrang hrang a siamte hmang tangkai turin nu ho chu a fuih a. SHG thil siamchhuahte pawh zau zawka thehdarh dan leh man man zawka an hralh theihna turte ngaihtuah a pawimawh thu a sawi bawk.

Hemi hma Zirtawpni chawhnu khan Union Minister of State for Consumer Affairs, Food and Public Distribution Nimuben Jayantibhai Bambhaniya-i ho hian Khawzawl DC Conference Hall-ah sawrkar hmalakna hrang hrangte thlirletna leh sawihona neih a ni a, He hunah hian Union Minister chuan sawrkar Scheme hnuaiah Loneitu tam zawkin hamthatna an dawn theih nan hmalak nise a ti a, hemi atan hian awareness neih a pawimawh thu leh ram hmasawnna turin thalaite an pawimawh thu a sawi bawk.