Union Minister in Thuampui-a MULCO hmun a tlawh

Union Minister for Fisheries, Animal Husbandry & Dairying leh Panchayati Raj Rajiv Ranjan Singh chuan nimin khan Thuampui-a MULCO hmun tlawhin Mizoram-a Cooperative Dairy Sector tihchakna tura hmalakna hrang hrang a tlangzarh.

Mizoram Milk Producers' Co-operative Union Ltd. (MULCO) hmun a tlawhna ah hian Union Minister hi MULCO Manager leh Official-ten lo dawngsawngin Mizo Café leh FPO Office-cum-Sale Outlet chu a hawng a, MULCO Dairy Processing Plant tlawh nghalin National Dairy Development Board (NDDB) Official-ten Milk Processing plant 20 TLPD tihchangtlun leh tihchak dan tur sawipuiin an mamawhte an thlen a ni.

Union Minister Rajiv Ranjan Singh chuan Mizoram Milk Producers' Co-operative Union Ltd. (MULCO) hmasawnna hmel hmuh tur awm mek chungchangah lawmthu a sawi a. Dairy Cooperative-te leh thawktute hmalakna avanga MULCO-in hma a sawn hret hret chu lawmawm a tih thu tarlangin, he hmasawnna hi chhunzawm zel a nih theih nan Union leh State Sawrkar te chu thawkho in hma an lak chhunzawm zel tur thu a tiam a. Mizoram chhunga bawnghnute tharchhuah (milk production) dinhmun chu a la tlem hle tih sawiin, kan mamawh min la phuhruk tawk lo tih a sawi a. Kan chhehvel State-te lakah kan hnufual bik tur a ni lo, tiin ranvulhtu leh Official-te chu tan la thar zel turin a ngen a ni.

Union Minister chuan hmalakna hrang hrang sawiin, ranvulhtute leh State sawrkar tana chanchin lawmawm tak ni turin Central Sawrkar-in sum (matching share) a thawh dan a thlak danglam thu leh75:25 ni thin chu 90:10-ah thlak a ni tawh dawn tih a sawi a. Hei hian state sawrkar sum thawh tur nasa taka tihhniam avangin hmasawnna hnathawhte a chak phah hle dawn tih a sawi a. Milk Processing Plant-te leh Village-Level Procurement System-te tihchangtlun zel a ni anga, NDDB nen thawkho in Bawng chi tha (Artificial Insemination) leh ranchaw (fodder) tha farmers-te hnenah awlsam zawka chhawp chhuah a ni ang tih a sawi a. MULCO hmangin Mizoram chhunga tharchhuah Paneer, Rasmalai leh bawnghnute hriak (ghee) te chu Aizawl leh a chhehvel bazaar-ah nasa zawka zawrh chhuah a ni ang tih a sawi a. “Central Sawrkar chuan North East Bial hmasawnna turin thlawpna tha ber pek a inhuam a, amaherawhchu heng hmalakna hlawhtlinna tak tak chu State Sawrkar leh ranvulhtute tanlakna ah a innghat a ni,” a ti bawk.

He hunah hian hmalakna thar leh product hrang hrang tlangzarh niin, chung zingah chuan MULCO Cow Ghee bakah khawl chi hrang hrang - Baled Silage, Type-II Cattle Feed, Dewormer leh Mineral mixture product-te pawh tlangzarh an ni a. Fisheries KCC Card te, Best Startup in Fisheries award leh Best Fisheries Cooperative recognition-te sem a ni bawk.