Tourism Director ruat nawn duh loh lantirin MZP ten Tourism-a thawktute Pisa kai tur an dang

Mizo Zirlai Pawl (MZP) chuan Tourism Department Director atana R. Lalrodingi ruat nawn leh a nih duh loh lantir nan nimin khan Tourism Department-a hnathawkte Pisa kai tur an dang a. Ruahman lawk ang chuan Vawiin pawh hian dan chhunzawm leh tur a ni ang.

MZP te hian ruahmanna an lo siam lawk tawh angin Tourism Director atana R. Lalrodingi ruat nawn an duh loh lantir nan leh Order siam tawh sut ngiatin nimin May 25, 2026 zing dar 7:30 atang khan Tourism Department-a hnathawkte Pisa kai tur hi an dang a, MZP hian Tourism Directorate Pisa kawngkapui chu Tala-in an kalh a, hrui pawtin Tourism Director ruat nawnna sut an duh thu leh mimal induhsakna an duhloh thute an tar a. Police engemzaw zat duty-in buaina leh harsatna thleng a awm lo a ni.

MZP President C. Lalremruata chuan an hmalakna chu a mimala R. Lalrodingi an huat vang a nih loh thu leh mimal induhsakna lian tak a awm nia an hriat chu an duh loh ber a nih thu a sawi a, MZP chuan sawrkar hnathawk pension rawih nawn hrim hrim chu tunhma atanga an duh loh thin tawh a nih thu sawiin, thalai hna zawng mekte tan leh zirlai hmabak eng tak tak neite tan inrawih nawnna hi an duhlohna an lantir thu leh sawrkar pawhin an hmalakna leh an aw a ngaihthlak sak ngei an beisei thu a sawi a ni.

Thudawn danin nimin-a MZP ten Tourism Department-a thawktute dan an tum avang hian he Office-a thawktute zingah Pisa kai tum an awm lo a, nimin tlai dar 4:00 khan Pisa kai tur dan hi titawpin Tourism Director hi a bang emaw, Order hi sut emaw anih loh chuan a hun leh a hmun ngai, Tourism Department Office kawt-ah tukin dar 7:30-ah MZP te hian punkhawm leh an tum a ni. Mizoram mipui thlawpna nasa tak an dawn avangin MZP chuan lawmthu an sawi a, College zirlai, Hnampual zirlai hruaitu zawng zawngte chu he thil diklo tak dodalna hmunah hian lo tel leh vek turin MZP chuan a sawm nawn nghal bawk a ni.