Sabse Door, Sabse Pehle zofel

Tun thla ni 18 atanga Siaha District-a neih Jan Bhagidaari IEC Campaign ‘Sabse Door, Sabse Pehle’ chu nimin khan zawhfel a ni ta a, PM JANMAN leh DA-JGUA hnuaia buatsaih he Campaign in a tum ber chu hmun kilkhawr ber thlenga chengte chu sawrkar atanga hamthatna Scheme hrang hrang hriattir a, an chanvo dik tak an chan theih nana tanpui a ni a. Siaha RD Block leh Tipa RD Block huamchhunga khaw 27-ah he hmalakna hi kalpui niin mipui 2,830 vel an tel a, nimin khan Siaha DC Conference Hall-ah he hmalakna hi Closing-cum-Debriefing Programme hman a ni.

Khawzawl-ah pawh nimin khan DC Conference Hall-ah PM JANMAN leh DAJGUA hnuaia ‘Jan Bhagidari – Sabse Door, Sabse Pehle’ Campaign kharna inkhawm hi neih a ni a, Department hrang hrang ten Campaign neih chhunga an hmalakna te tarlangin, Bawrhsap K. Vanlalthiana chuan he Campaign a hlawhtlin theih nana thawktu line Department-te chungah lawmthu a sawi a. Mipui tam zawkin sawrkar Scheme hrang hrang an hmelhriata hamthatna an dawn ve theih nan Awareness nei zel a pawimawh thu a sawi bawk.