Online Medical Referral System siam thar Health Minister Lalrinpuii’n a tlangzarh

Mipuite tana Healthcare Service leh sawrkar hnathawh tihchak zualna turin nimin khan Health & Family Welfare Department changtu Minister Lalrinpuii chuan ‘Online Medical Referral’ chu a hawng.

SAD Conference Hall-a ‘Online Medical Referral’ hawnna hunah hian Health Minister Lalrinpuii chuan Health & Family Department hnuaia awlsam taka Online-a Medical refer tih theih a ni ta mai chu lawmawm a tih thu sawiin, Digital hmalakna-te hi Healthcare Governance tih changtlunna leh mipuite tana kawng awlsam leh hmalakna tha zawk thlenna kawnga hmasawnna pawimawh tak a ni tih a sawi a, Online System hi document dahthat nan te, Information inpek nan te leh awlsam zawka mipuite dawrna kawngah hmang tangkai turin kalkhawmte a chah a. Tunlai khawvel thiamna (digital) hmangin MUHCS Online Registration pawh awlsam taka tih theih a nih thu sawiin, tun dinhmunah chhungkaw 46,000 chuang an in register tawh thu a sawi bawk a. “He Online Medical Referral System hi a nihna tur tak a hman a nih theih nan kan hnathawhna ah tih takzet leh tha thlah lova kan thawh a ngai,” tiin Emergency Refer atan a tangkai tur thu leh a viltuten an vil hneh a ngaih thu a sawi bawk.

Damlo phai-a refer, a bik takin Aizawl District pawna awm te tan hun khawhral lo leh an refer-na hmun rang taka an thlen theih nan Directorate of Hospital & Medical Education (DHME) leh Mizoram State e-Governance Society (MSeGS) te tangkawp chuan Online Referral System hi an duang a. Medical Referral Board hi tun dinhmunah Aizawl leh Lunglei-ah chiah awmin, Medical Referral Board-in a recommend te chu an thawhna Department atanga Forwarding lehkha nen DHME-ah Provisional Permission dil a ngai thin a. Hei hi damlo tan a buaithlakin hun tam tak khawhral thin a. Tunah chuan District Hospital tinah District Screening Committee (DSC) din ni tawhin, phaia damlo refer ngai te an awmna District DSC te’n lo zirchiangin, Medical Referral Board (Aizawl & Lunglei)-te nen Video Conferencing hmangin recommendation an siam tawh anga; chu recommendation chu DHME-ah kal kher ngai lovin Phone emaw, Personal Computer emaw atangin link medicalreferralmizoram.in-ah lutin online hmanga permission hi cheng 20 chawiin dil tur a ni.

He Online Referral Portal hi Sawrkar hnathawk-te tana siam a ni a, an department thawhna atanga forwarding letter leh Board lehkha nen upload mai tur a ni a. Provisional permission nen hian Mizoram State Health Care Society (MSHCS)-ah in-report leh tur a ni. Sawrkar hnathawk nilo (MUHCS beneficiaries - General) te chu MUHCS-ah Medical Board lehkha nen in report tur a ni thung a. Final permission hi document enfel a ngaih avangin DHME-ah damlo emaw, an chhungte emaw Office hun chhunga kalin lak chhuah theih a ni ang.