Nurse te indaihlohna phuhru turin hmalak mek a nih thu Minister in a sawi

Health Minister Lalrinpuii chuan nimin khan Mizoram Government Nursing Service Association (MGNSA) Conference hmanpuiin Nurse te indaihlohna phuhru turin hmalak mek a nih thu a sawi a. Hei bakah hian Aizawl Civil Hospital leh ZMC&H tihchangtlunna kawngah hmalak mek zek a nih thu a sawi bawk.

Mizoram Government Nursing Service Association (MGNSA) Conference vawi 23-na nimin-a Aizawl Civil Hospital Conference Hall-a neih ah hian Health Minister Lalrinpuii chuan Nurse hna chu hna naran a nih loh thu leh inpekna nasa tak nei ten taimakna, dawhtheihna leh inpumpekna nasa tak nena thawh ngai a nih thu a sawi a. “Mizoram sawrkar chuan Nurse te pawimawhzia hriain, an indaihlohna te phuhru turin kum 2025 April thlaa Mizoram Universal Health Care Scheme tlangzarh a nih dawn khan Nurse 300 chuang lak an ni a, hei bakah hian a nghetin Nursing Officer sawm (10) lak an ni,” a ti a. Health & Family Welfare hnuaiah Contract-in Nurse 40 lak an nih leh dawn thu leh Senior Nursing Officer pawh sawm (10) lak thuai a ni dawn tih a sawi a. Nursing School lamah Tutor post 9 leh Warden post pakhat atan MPSC Written Exam result nghah mek niin Nursing College lam atan Assistant Professor post 5 advertisement nghah mek a ni bawk tih a sawi a, “Vawi leh khatah an indaihlohna te phuhru thei lo mah se, hmasawn zel turin Mizoram Sawrkar chuan hmalak chhunzawm zel a tum a ni,” a ti.

Aizawl Civil Hospital tichangtlung tura sawrkar hmalakna hrang hrang pawh Health Minister chuan sawiin, Cath Lab dah thar niin MRI khawl bakah bungraw chi hrang hrang dah a nih thu a sawi a. Mipui chhiah tlingkhawm – Cess atangin Artroscope khawl thar cheng nuai 120 lei a ni a, Kal thlak (kidney transplant) pawh tih tan thuai tum niin inzaina bungrua lei chhoh mek a ni a, thawktute pawh a bika training turin Kolkata tirh an ni tawh tih a sawi a. Current awm loh zauh zauh changa Civil Hospital te an buai lohna turin VIP line zamna tur pawisa leh Oxygen Pump khawl thra man tur pawh sawrkarin a pe fel tawh tih a sawi bawk.

ZMC&H lamah pawh Cardio-thorasic Surgery ti turin an inbuatsaih fel tawh thu Minister chuan sawiin, thawktute training neiin PGI Chandigarh lamah an kal tawh tih a sawi a; CT Scan thar hawn fel niin, Siaha leh Champhai-ah CT Scan dah thar a nih thu leh Oxygen Plant thar neihna tur sum pawh Sawrkarin a pe tawh tih a sawi a; Mamit District Hospital building thar pawh luahluh mai tura peihfel a nih thu a sawi bawk.

Nimin-a Mizoram Government Nursing Service Association (MGNSA) Conference-ah hian an pawl President H.S. Lalremtluanga chuan thuchah sawiin, ‘National Florence Nightingale Award’ dawng mi pahnih (2) V. Lalhmangaihi, Nursing Officer leh  H.Mankimi, Senior Nursing Officer te bakah an hruaitu hlun Lalhmingmawia Thangluah, Nursing Officer te hnenah chawi-mawina an hlan a. An Member boal mi pakhat sunna hun hmangin pension-a chhuak mi 51 an thlah bawk.