NE tan Prime Minister in Vision a neih thu sawi

Union Minister of Fisheries, Animal Husbandry and Dairying Rajiv Ranjan Singh chuan hmarchhak Bial hmasawnna turin Prime Minister in hmathlir a neih thu leh chu hmathlir puitlinna atan Central Sawrkar chuan a theih apiang tih a duh thu a sawi.

Nimin khan Aizawl-a High Court Hall-ah hmarchhak State pariat(8) - Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura-te chuan Regional Review Meeting neiin he hunah hian Union Minister chuan Prime Minister Modi-a’n hmarchhak Bial hmasawnna tura hmathlir (vision) a neih chu tarlangin, Central Sawrkar chuan chu vision puitlin a nih theih nan a theih apiang tih a duh thu a sawi a. Sangha khawi, Ranvulh leh Bawnghnute thar lama hmasawnna hian hmarchhak Bial-ah economic development tha tak a thlen theih thu sawiin, he Sector hian mimal hmasawnna chauh ni lovin, Bial pum hmasawnna a thlen dawn a ni, a ti.

Sangha khawi chungchang pawh Union Minister chuan sawiin, PM Modi-a kaihhruaina hnuaiah Blue Revolution, Fisheries and Aquaculture Infrastructure Development Fund (FIDF), PM-Matsya Sampada Yojana(PM-MSY) leh hmalakna dang tam tak a awm thu a tarlang a. Heng hmalakna te avangin hmarchhak Bial-a Sangha tharchhuah chu kum 2014-a tonne nuai 3.78 kha kum 2025-ah chuan tonne nuai 7.05-ah a kaichhoh thu a sawi a. Hemi bakah hian kum 12 (2014-2025) kalta chhung khan sawrkar laipui chuan cheng vbc. 2,228 zet hmarchhak State-te a lo pek tawh thu a sawi a. Arunachal Pradesh-a Ziro-ah India rama Integrated Aquapark hmasa ber hawn a nih thu leh Integrated Aquapark dang 11 din tura ruahman zinga 4 chu hmarchhak Bial-a din a nih dawn thu a sawi a. Mizoram pawh hetiang hmun din nan hian Detailed Project Report leh a hmun tur (land site) siam turin a sawm bawk.

Ranvulh chungchangah hmarchhak State-te chuan Bawnghnute tharchhuah ah zaa 37, Artui tharchhuah ah zaa 40 leh Sa tharchhuah ah zaa 15 in hmasawnna a awm thu sawiin, hmasawnna nasa zawk hmu zel tura tan la turin a fuih a. Hmarchhaka khaw tinah Cooperative Society-te chawisan a ngaihpawimawh thu leh Artificial Insemination (Ran kah rai), Infrastructure Development), Technology din leh mihring thiamna (human capacity building) tihsan a ngaih thu a sawi bawk.

Union Minister chuan Sangha khawi, Ranvulh leh Bawnghnute tharchhuah kawngah hmarchhak State-te hi mahni khamkhawp thar (self-sufficient) thei tura ruahmanna neih a nih thu sawiin, State Minister-te leh Official dangte chu sawrkar laipui nen thawkho a, Schemes hrang hrang kalpui dan endik a, tihdan tha ber berte hmang a hmalakna hrang hrangte a hun taka tihpuitlin a nih theih nan hma la turin a sawm bawk a ni.