MUHCS 2.0 hmang thei tura inziaklut chhungkua 46,228 an awm

Mizoram Universal Health Care Scheme (MUHCS) 2.0 atana inziahluh hun tawp ni, May 15, 2026 thleng khan online hmangin chungkaw 46,228 inziaklut an awm a, nikum aiin inziaklut hi a let chuangin an tam zawk a ni.

Kumin April 1 atanga hman tan MUHCS 2.0 hmang thei tura inziahluh hun hi May 15, 2026 khan tawpin hriat theih chinah inziaklut chhungkaw 46,228 awmin mihring ah chuan mi 2,19,353 ten hmang thei tura ngaih a ni a, kum 2025-2026 chhunga MUHCS 1.0 kalpuiah khan inziaklut chhungkaw 20,213 awmin nikum nena khaikhinin kumin-a inziaklut hi 26,015 in an tam zawk a ni. MUHCS hi mi nuai 12 velin an hmang thei dawn nia ngaih a ni a, Offline-a inziaklut leh Pensioner inziaklut zat hi la hriat theih loh ni mah se, chhut danin Online-a inziaklut 2,19,353 te, AB PM-JAY atanga MUHCS zawm mi 5,99,433 te, sawrkar hnathawkte leh offline leh pensioner te nen mi nuai 12 velin MUHCS hi an hmang dawn niin ngaih a ni.

MUHCS 1.0-ah kha damlo inenkawl senso bill pek theih loh a awm lo a, bill an pe tha a ngaih a ni a, MUHCS zawmtu mimal enkawl damdawi In te pawhin an thatpui niin hriat a ni a. MUHCS 2.0 kalpui mekah bill cheng vbc. 15.69 pekchhuah a ni tawh a, hetihlai hian Technical thil avangin PM-JAY zawmtu bill erawh pek rih loh a awm thung a ni.