Minor minerals atanga chhiah lak insem dan tur rel

State Sawrkar leh Autonomous District Council ten Dan-in a phut anga Minor Minerals (lung, balu, brick earth/clay) atanga Royalty (chhiah) hmuhte insem dan tur chu nimin khan Commerce, Industries, Geology & Mining Minister F. Rodingliana hovin a Pisa-ah sawiho a ni.

India Constituiton 6th Schedule Para 9(ii) in a sawi angin Autonomous District Council Area chhunga heng mineral te hi State Sawrkarin phalna pein a enkawl tur a ni a, chhiah (royalty) pawh a khawn tur a ni a. Heng royalty a hmuh atang hian Autonomous District Council te hnenah an chanvo (share) an pe ve tur a ni a. India rama State 4-Assam, Mizoram, Meghalaya leh Tripura ten 6th Schedule area neiin Autonomous District Council an nei hlawm a. Heng State dang pathumten royalty an insem (share) mek dan zirchianna leh sawihona hun an hmang a ni.

Tuna Mizoram chhunga kalpui danah chuan Autonomous District Council ten heng minor mineral te hi enkawlin royalty pawh an la chang vek a. Amaherawhchu, heng Minor Minerals te hi State-in a enkawlin royalty pawh a khawn zawk tur a ni tih tarlan niin India Constitution leh Mining Dan (Legislation) anga kalpui tawh turin royalty insem dan tur Department in ruahmanna a siam te sawiho a ni a. Chhiah insem dan tura Department in rawtna an siamte ADC huamchhunga MLA te nen sawiho niin Geology & Mining Joint Director Department Er. Lalremmawia chuan powerpoint presentation pein Minor Minerals atanga royalty (chhiah) insem dan tur India Danpui (Constitution) leh Mining Dan (Legislation) a tarlan te a sawifiah a. Tuna Geology & Mining Department ten proposal an siam chu Sawrkar ngaihtuah tura thehluh phawt nise an ti a ni.