Kum 2027-2028 chu Sawhthing hmun ngheta chin leh Organic uar zawka kalpui kum-ah puan a ni

Mizoram-a Sawhthing chingtu ten Sawhthing an hralhna tura hmalakna kal mekah kum 2027-2028 chu ‘Hmun ngheta chin leh Organic uar zawka kalpui’ (Year of Sustainable Cultivation and Organic/Natural Farming) kum-ah puan a ni.

Adviser to Chief Minister Dr. KC. Lalmalsawmzauva chuan Sawhthing man man zawk leh mumal taka hralh a nih theih nan Primary Collection Centre (PCC), Secondary Collection Centre (SCC), Mizoram Agricultural Marketing Board (MAMB) leh District Agricultural Marketing Committee (DAMC) te hi inbepawp reng tih sawiin, “Sawhthing market kan kalpui mekah hian mawlmang taka thil kalpui kan tum lo a, Research-based a kalpui kan nih avangin tum mumal tak nen year-wise target neiin hma kan la mek,” a ti a. An hmachhawp te pawh sawiin, First Phase kum 2024-2025 chu bultan kum leh insiamrem kum (Year of system formation)-ah puangin Second Phase kum 2026-2027 chu a sawngbawlna uar kum (Year of Processing & Value addition)-ah an puan thu leh Third Phase kum 2027-2028 chu ‘Hmun ngheta chin leh Organic uar zawka kalpui’ (Year of Sustainable Cultivation and Organic/Natural Farming) kum-ah an puang tih a sawi.

Dr. KC. Lalmalsawmzauva hian niminpiah khan Tuirial Secondary Collection Centre (SCC) atanga kumin chhunga Sawhthing hralh-chhuah hnuhnung ber phur a vailiam bakah Handholding Scheme hnuaia Sawhthing Processing Plant, Sairang atangin a vawikhatna atan Sawhthing sawngbawl sa (Slice dried Ginger) MT 5 phurtu lirthei a vailiam leh bawk a. Hemi puala hun hman ah Mizoram-a kan Sawhthing thar in hmun hla tak tak a thleng ta chu lawmawm a tih thu sawiin, kalkhawm te zingah Sawhthing sawngbawl dan tura ngaihdan tha zawk nei te an awm anih chuan sawrkar hnena thurawn pe hreh lo turin a chah nghal bawk a. Handholding hnuaia Processing Unit atanga thla 4 chhung leka an product hmasa ber MT 5 vailiam theih a ni chu thil chhinchhiah tlak tak a ni tiin, an thawpui Good Faith leh Slice Dried Ginger leitu company, Nature Sampann te bakah a Processing khawihtu Entrepreneur te chungah lawmthu a sawi a. Process-ah hmabak an la ngah thu leh fimkhur ngai lai tam tak a la awm thu te, FSSAI Registration leh Chemical test te paltlang a ngaih thu sawiin, a phur nazawng tih chi a ni lo tih a sawi bawk.

He hunah hian MAMB Managing Director Lalhmingmuana chuan kumin-a Sawhthing lei leh hralh tawh dan report pe in, Mizoram chhungah Sawhthing quintal 82972.10 chu Support Price pek tawh anih thu sawiin, hemi atan hian pawisa Rs. 22,25,78,995 pekchhuah tawh anih thu a tarlang a, Sawrkarin thlai thar doletna tur Support Price atan a dah cheng vbc. 150 atangin cheng vbc. 40 vel chauh hman a nih thu a sawi bawk.