Covid hlauhthawnawm ni lo

Health Department chuan tunhnaia Mizo-ram-a COVID-19 hri a darh thar anga sawi chu hlauhthawnawm anih loh thu an sawi.

Tunhnaia COVID-19 hri a darh leh anga thuthang awm chu Ningani khan Health Minister, Lalrinpuii hovin Health Department hotuten an sawiho a, he thut-khawm ah hian Health Department hotute chuan ZMC&H bikah damlo thawk lama harsatna neite chu COVID-19 hri an kai leh kai loh endik zel a ni a, May thla kal mek chhungin hri kai 53 hmuh-chhuah an awm tawh a, hetihrual hian hri kai hmuhchhuah zingah na lutuk an awm lova, heng hri kai hmuh zinga a tam zawk chu COVID-19 hri danna, Vaccine la ve lo, naupang piang hlim atanga kum khat inkar an ni tlangpui tih an sawi a ni.

Sawrkar laipui Ministry of Health and Family Welfare-in COVID-19 chu natna awm ve reng tawh (endemic) anga ngai tur tih nikum lam khan hriattirna tichhuakin, State Sawrkar-te hetiang rilru hi pu turin thu a lo rawn tawh a. Mizoram-ah pawh COVID-19 hri kai hmuhchhuah awm zeuh zeuh mah se, hlauhthawnawm a ni hran lo tih an sawi a ni. Kumin chhung hian Mizoram-ah he hri kai mi 90 lai hmuhchhuah ni tawhin May ni 6 khan mi 18 hmuhchhuah niin tunah hian hri kai enkawllai mi 4 an la awm a ni.