Chief Minister hovin Ginger USP Project kalpui dan tur sawiho

Nimin khan Chief Minister Lalduhoma hovin ‘Ginger USP Project’ kalpui dan tur sawihona neih a ni.

CM Conference Hall-a sawihona neih a tarlan a nih danin Ginger USP Project hi Department 5 velin thawkho (Convergence)-in an kalpui dawn a, Champhai Mualkawi-ah Sawhthing sawngbawlna pui ber dah a ni anga, a process-na pui ber a thlen hmaa lo bunlawkna tur, a process-na tenau pathum (Spoke Hub) chu Tualcheng, Zotlang leh Vaphai-ah te dah a ni ang. Spoke Hub-ah hian Sawhthingte chu tihfai a, hralh nghal chi leh hralh nghal mai chi loh thliar (grading) a ni anga, a channa (slice) a awm bawk anga, a tihrona a awm bawk ang. Chutianga tih theih loh chin, a Oil siamna te, a Branding te leh a dangte chu a hmunpui ber Mualkawi-ah thawh a ni anga. Kumin chhungin a khawl bun fel hman tum niin a khawlte hi sawrkar enkawl lova mimal Investor/Entreprenuers/Socuety te enkawltir tura duan a ni a. Nimin-a thutkhawm ah hian he Project kalpui dan tur indawt leh huntiam neia thawh ngai chi zawng zawngte chu chipchiar taka sawi a ni.

Tarlan tawh angin Ministry of DoNER chuan Mizoram Sawhthing chu Unique Selling Proposition a pe a, chumi behchhan Project Mizoram Ginger Sustainable Cultivation & Value Chain Development chu cheng vbc. 189.78 senna tur siam niin, he project chhunga hmalakna pakhat Processing Unit dinna tur hi DoNER chuan NEC-ah cheng vbc. 30.13 a sanction tawh a. Sustainable Cultivation hi Ministry of Agriculture & Farmers Welfare te, Ministry of Rural Development te, Ministry of Food Processing Industry te, NABARD, ICAR leh IFAD te nena thawkho a kalpui tur a ni.