Bana Kaih Scheme hnuaia hmalakna kalpui mek thlirho

Mizoram Sawrkar Flagship Scheme - Bana Kaih Scheme kalpui meka Loan dawng tawh Progress Partner leh Chief Minister Special Package dawngtute hmalakna thlirletna chu nimin khan Aizawl-a I&PR Auditorium-ah neih a ni.

Nimin a he hun hman hi Handholding Scheme-a CEO Lalfakzuala chuan kaihruaiin Adviser to Chief Minister (Implementation of Handholding Scheme) Dr. KC. Lalmalsawmzauva chuan Handholding Scheme kaltlanga loan la leh Chief Minister Special Package dawngtute zingah hmasawn pui tam tak an awm rualin hmasawn pui vak lo pawh an awm theih thu a tarlang a. Hlawhtlin pui ve lo te harsatna te zirchian leh hlawhtling ve tura an harsatna sutkian a nih theih nan Implementing Department-a mithiam ten an hmalakna a hmun ah ngei zirchianga, bana kaih an mamawhna laiah hlawhtling tura kai kal zel turin a fuih bawk a ni.

Bana Kaih Scheme hnuaia Progress Partner thlanchhuahte leh Chief Minister Special Package dawngtute hmalakna thlirletna hunah hian State Bank of India (SBI) aiawh tarlan danin, loan dawng thei tura mi thlanchhuah 101 an awm a, Loan pek chhuah tawh hi cheng Vbc. 9.46 ni tawhin, loan pekchhuah hmabak mi 49 a awm mek a. Mizoram Rural Bank (MRB) hnuaiah loan pek tur mi 286 awmin mi 164 pekchhuah tawh a ni a, Loan pekchhuah tawh hi cheng Vbc. 22.06 a ni. Mizoram Cooperative Apex Bank (MCAB) kaltlanga Bana Kaih Scheme hnuaia loan dilna lut 105 atangin 56 chu pekchhuah tawh a ni a, sum an pek chu cheng Vbc. 9.35 a ni.

Hei bakah hian Implementing Department tin atangin Bana Kaih Scheme hnuaia Progress Partner leh Special Package dawngtute hmalakna tarlan a ni a. Bank lamin harsatna an neihte chinfel dan tur leh Monitoring chak lehzuala kalpui a nih theih dan tur sawiho niin Bana Kaih Scheme kalhmang zau zawka inzirtirna leh hlawhtlinna changte lawmpuina hun buatsaih dan turte sawiho a ni.