Aizawl Zoological Park-a ramsa/sava 12 a bo tawh

Aizawl Zoological Park awm tirh atangin Ramsa leh Sava 12 a bo tawh a, tun thlengin hmuh let a la awm lo.

Aizawl Zoological Park hotuten Akashvani Aizawl News zawhna RTI hmanga an chhan danin, kum 2006 November ni 24-a Aizawl Zoological Park, Sakawrtuichhun din a nih atang khan ramsa/sava 12 an bo tawh a. Chu’ng zingah chuan Rufous Hornbill, Lear Macaw leh Pesquet Parrot an tel tih sawiin, tun thlengin hmuh let an la nei lova, pakhat an la zawng mek tih an sawi a ni. Aizawl Sahuan-a ramsa/sava bo te hi Police Station-a FIR thehluh bakah CID leh Mizoram Police Uisathiam hmang te in zawn thin an nih thu sawiin, tun thlengin a chhuina (investigation) result hlawhtling tak an la hmuh lo tih an sawi a. Ramsa/sava bo chungchangah hian thawktu emaw, pawnlam mi emaw man an la awm lova, thawktute lakah hremna lek a la awm lo bawk tih an sawi a ni.

Kumin January thla thleng khan Aizawl Zoological Park-ah hian ramsa chi hrang (species) 38 awmin a vaiin ramsa 172 leh sava 8 an awm a. Heng zingah hian rampawn atanga lakluh (exotic animal) chhiar tel a ni lo thung. Sahuana ramsa te hi Mizoram chhung ami te bakah Central Zoo Authority pawmpuina a State dang Sahuan atanga ramsa te nen inthleng thin a ni a. Tun dinhmunah Sahuan-ah hian a hmunah enkawltu mi 31 an awm mek a, an indaih lo hle tih thuneitute chuan an sawi a. Kum 2025 April thla atanga kumin March ni 2026 chhung khan tlawhtu mi 38,125 an awm a, October thla atanga March thla bawr vel chu Sahuan tlawhtu an tam ber hun lai a nih thu an sawi a ni.