Serchhip-ah International Women's Day hmangin hmeichhe chhuanawm te chawimawi an ni
.jpeg)
Serchhip DC Pisapui Hall-a hun hman ah hian Bawrhsap Paul L. khuma chuan tunhmain India ramah hmeichhiate dinhmun a hniam thin hle a; Hindu dan tha lo tak hmeichhe pasal sun te hal hlum (Sati) te, hmeichhe thuamchhawm Dowry System te leh Society in a kentel hmeichhe dinhmun tha lo tam tak avangin hmeichhe fa tihhlum, Female infanticide te pawh a hluar hle thin tih a sawi a. “Sawrkar chuan hmeichhiate dinhmun chawikang turin nasa takin tan a la a, tunah chuan Mizoram-ah ngei pawh rorel khawl sang berah thuin, Minister leh MLA te kan nei ta a ni,” a ti a. Khawtlang leh chhungkuaa hmeichhe dinhmun pawimawhzia sawiin, “Hmeichhiate tel lovin khawvel a kal thei lo a; mipate tifamkimtu, tichaktu leh timawitu an ni,” tiin. “Kan ram siamtha turin chhungkua ah bul kan tan a ngai a, chu chhungkua khalh ngil tur chuan kan inchhungkhura nu ber te an pawimawh a ni,” a ti a, International Women’s Day ah hian hmeichhiate pawimawhzia leh hlutzia hre thar turin he huna kalkhawmte chu a chah bawk.
He hunah hian Khual zahawm leh Mizoram State Commission for Women-a Chairperson C. Zodinpuii chuan International Women’s Day puala hun hmanga tura kalkhawmte chibai bukin, India Danpui leh Hmeichhia te humhalhna Dan hrang hrang awm mah se heng te hi la hre lo tam tak leh la zawm lo te an awm thin thu leh hmeichhia te chu chhungkua-ah eizawngtu ber leh hna thawktu ber an ni chung pawha hleilenna tuar an la awm fo thu a sawi a. Hmeichhia te zingah Inchhungkhur-a hleilenna tawk te leh harsatna dang dang tawh te tan sawrkar chuan kawng hrang hranga ruahmanna a siam thu leh a thlawna biakrawn theih tur thlenga a ruahman thu te pawh a sawi bawk.
District Hub For Empowerment of Women, DPO Office, Women & Child Development Serchhip huaihawta Serchhip-a International Women’s Day puala hun hman hi District Programme Officer, Lalthlamuani chuan kaihruaiin he hunah hian Serchhip District-a Hmeichhe chhuanawm pahnih- Noth East-a Paediatric Critical Care Super Specialist hmasa ber Dr. F. Remthangpuii, E. Lungdar leh Dairei Banana Chips-a Manager & Co-Founder, Laltlandiki Fanai, Khumtung te chawimawina hlan an ni a. Anganwadi Workers te tana ‘Teaching Learning Material’ insiam siakna buatsaiha titha te hnenah lawmman hlan ni bawkin Annette Vanlalhmangaihzuali, New Serchhip Anganwadi Centre-I chuan lawmman pakhatna dawngin Esther Lalhmangaihzuali, New Serchhip Sihphir Anganwadi Centre chuan lawmman pahnihna leh Lalhlimpuii, Then-tlang-II Anganwadi Centre ten lawmman pathumna an dawng a, midang pahnih hnenah Consolation Prize hlan an ni bawk.
Comments
Post a Comment
I ngaihdan i sawi hian mipui ngaihdan i tarlang a ni!