Ramri kan-a Lo vat nia sawi DC leh SP in bawhzui

Kolasib District chhung Saipum ram chhunga Assam mi Lo vat an awm ni a thu darh chungchang bawhzuiin niminpiah khan Kolasib Bawrhsap Robert C. Lalhmangaiha leh Senior SP Lalrinpuia Varte te chuan Saipum khua tlawhin, he thil thleng chungchangah hian Saipum khawtlang hruaitute thil awmdan an sawipui.

Kolasib Bawrhsap leh Sr. SP te hnenah hian Saipum khawtlang hruaitute chuan thil thlen dan tlangpui tarlangin, hnamdang ten Lo vah nana hmun an rawn ruahman hi a hma chuan Mizoram sawrkar hnuaia Police te duty-na thin, Chawilung Camp awmna hmun a nih thu an sawi a. Kawng chhiat avanga he hmuna Police duty te an awm theih tak loh hnuah venhimna hna a lo chak tawk ta lo chu remchangah lain Assam lam atang hian an rawn zuam ta nia an ngaih thu an sawi a ni.

Kolasib Bawrhsap Robert C. Lalhmangaiha chuan he thil thleng hi Sawrkar pawhin a ngaipawimawh hle tih sawiin, buaina leh inepna chhuak lova boruak muanawm tak hnuaia chinfel a nih theih dan kawng zawn chu thil tul hmasa a nih thu a sawi a. A tul ang zela hma la turin sawrkar a inhuam thu khawtlang hruaitute hi a hrilh nghal a ni.

Saipum khawtlang hruaitute chuan he hmun hi an pual ram, Saipum ram ngei a nih thu uar takin an sawi a, Assam lam atanga he hmalakna hi an kalpui tlang zel a nih chuan nakin zelah ramri buaina hlawm lian zawk a chhuah theih dawn thu an thlen a. Sawrkar chu a hma thei ang bera hma la turin an ngen a, remna leh muanna nena he harsatna chinfel a nih theih dan tur kawng hrang hrang an sawiho nghal bawk a ni.

Saipum ramchhunga Assam mi ten Lo an vat nia sawi chungchang hi Assembly Session neih mekah pawh sawichhuah a lo ni tawh a, Chief Minister pawhin enzui a nih tur thu a lo sawi tawh bawk a ni.