May 11-ah Pro Volleyball League khelh tan a ni dawn

Zonuna Kawlni /

Mizoram-a Volleyball inelna ngaihhlut tak, Pro Volleyball League chu kumin May 11 atang khian a tum 9-na atan khelh leh a ni dawn a, Mipa Team 7 leh Hmeichhia Team 4 te an inel ang.
 Pro Volleyball League hi Falkland-a LPS Arena ah khelh leh tura ruahman niin mipa inkhel 24 leh hmeichhe inkhel tum sarih, a vaiin inkhel vawi 31 a awm dawn a. Mipa-ah Team pasarih - Anastasia Electric Veng, Thutak Nunpuitu Team, Tuichangral, Khawbel, Sihphir, Hunthar leh Chhinga Veng Spikers te vawi khat theuh an inkhelh kual chhuah hnua a sang paliin Semi Final an lut ang.

Hmeichhe-ah team li - Tuichangral, Chhinga Veng Spikers, ITI Veng leh Eric Pautu Academy te tum khat theuh an inkhelh kual chhuah hnuah a sang pahnihin Final an lut ve dawn thung a. June 12-ah Hmeichhe Final khelin June 13-ah Mipa Final khelin zawhfel a ni ang. Kumin hian zan dar 8:00-ah inkhel hi tan a ni anga, LPS Vision-in live-in a pe chhuak vek dawn a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »