Vawiin atangin Ruihhlo ngai pual Camping nei dawn

Serchhip District huap ‘Ruihhlo ngai pual Gospel Camping’ chu zanin hian Presbyterian New Serchhip Kohhran Biak In-ah neih tan a ni dawn a, tun thla ni 20 thleng awhin ni 21-ah Campers te an chhuak ang.
Nasha Mukt Bharat Abhiyaan (NMBA) Serchhip District in ruihhlo dona kawnga hma a lakna hnuaia neih tur he Gospel Camping atan hian ruahmanna hrang hrang peihfel thawkhat a ni tawh a, ruahman lawk ang chuan Vawiin chawhnu dar 1:00 atang hian Camping-a lut duh tan a hmunah inziahluh theih niin bungrua dahluh theih a ni anga, a lut nghal duh tan luh nghal theih tur niin awm tlang tur ni lo tan zan dar 6:00-ah zanriah ei sa in luh thung tur a ni dawn a, tarlan tawh angin he Camping-ah hian Speaker atan Bethel Ministry atangin Frederick Lalrindika hman a ni ang.

He Camping hi sawrkar Department te, Kohhran hrang hrang, NGO leh khawtlang mipui te tanrualna hnuaia kalpui tur niin budget atan cheng nuai 13 chuang hret ruahman a ni a, nimin tlai thleng khan mi tlawmngai sawrkar hnathawk, Kohhran, tlawmngai pawl leh Village Council te bakah mimal hrang hrang 204 te sum thawhkhawm chu Rs. 14,70,686/- a tling tawh a ni.

He Camping-ah hian Camp Fee awm lovin Campers te hi Doctor, Nurse leh Pharmacist ten uluk takin an vil dawn a, an mamawh ang ei leh in bakah damdawi te pawh a thlawna pek tura ruahman niin OST la mek tan pawh a hmun ah hian lak chhunzawm theih a ni dawn bawk a ni.