Sawhthing lei turin hma la

Mizoram sawrkar chuan Sawhthing lei turin hma a la zel a, Inrinni tlai khan Mizoram Agriculture Marketing Board (MAMB) Pisa-ah Agriculture Minister PC Vanlalruata chuan Opickpure Organic Private Ltd. te hnen atangin Sawhthing leina tur sum a dawng a ni. Opicpure te hian Sawhthing hi Khuangleng SCC atangin an lei tan dawn a, a bul tanna atan kg nuai 5 man tur cheng vbc. 2 an hlan phawt a, Sawhthing hi kg khat Rs. 40 in an lei anga, Mizoram sawrkar chuan Support Price a pe dawn a, kg khatah Rs. 10 zelin a lo thlawp dawn tihna a ni. Agriculture Minister PC. Vanlalruata chuan Sawhthing a hlawma lei duh lian zawkte nen an inbiak mek thu a sawi a, kuthnathawktu ten kg khat Rs. 50 aia to a an lei theih dan tur an ngaihtuah zel tih sawiin, a tlawm berah pawh kg khat chu Rs. 50 aia hniam in an hralh dawn lo tih a sawi bawk.