Serchhip District-ah nikum aiin kumin ah Police te thubuai ziahluh nasa takin a tlahniam

Kum kalta (2024) January thla atanga October thla thlenga Serchhip District chhunga Police ten thubuai an ziahluh aiin kumin (2025)-a hemi hun chhunga thubuai an ziahluh chu 55 zetin a tlem zawk a, thubuai ziahluh zingah hian rukruk kaihhnawih chu a tam ber a la ni bawk.

Kumin chhunga Serchhip District Police ten thubuai an ziahluh zinga chhui zawh loha la awm hrang hrangte chinfel dan tur ngaihtuahin nimin khan Serchhip SP Office Chamber-ah Crime Review Meeting neih a ni a, he thutkhawm ah hian nikum (2024) January thla atanga October thla thleng leh kumin (2025) January thla atanga October thla thlenga Serchhip District Police ten thubuai an ziahluh dan dinhmun thlirho a ni a. Nikum a thla 10 chhung hian Serchhip District chhungah Police ten thubuai 172 zet an ziahluh laiin kumin ah thubuai 117 an ziahluh thu leh nikum aiin kumin a thubuai ziahluh hi 55-a a tlem zawk thu tarlan a ni,

Nikum-a thla 10 chhunga thubuai ziahluh 172 zingah hian rukruk leh a kaihhnawih (Burglary leh Theft)-a thubuai ziahluh chu 113 zet niin a tam fal hle a, kumin ah pawh hian hemi kaihhnawih ah hian thubuai 73 ziahluh ni leh tawhin hei hi thubuai ziahluh zawng zawng atanga chhutin za zela 62.39 a tling a, kumin hian rukruk kaihhnawih ni lo-a thubuai ziahluh tam chu midang tihnat tumna kaihhnawih thubuai niin thuai 4 ziahluh a ni a, lirthei chetsualna thleng kaihhnawih ah thubuai 4 ziahluh awm bawkin mibum leh thubuai dang ziahluh a awm hlawm bawk a ni.

Kumin (2025)-ah hian Local & Special Laws hnuaiah thubuai 23 ziahluh a awm tawh bawk a, heng zinga a tam ber chu Zu leh a kaihhnawih a MLP Act hnuaia thubuai ziahluh niin thubuai 10 ziahluh a ni tawh a, hursualna laka naupangte venhimna Dan, POCSO Act hnuaiah thubuai 7 lai ziahluh awm bawkin ND&PS Act hnuaiah ruihhlo kaihhnawih thubuai 5 ziahluh a awm bakah Arms Act hnuaiah thubuai ziahluh pakhat a awm bawk a. Nikum-a thla 10 chhung khan POSCO Act hnuaia thubuai 4 ziahluh a awm laiin kumin hian nasa takin a pung a, ND&PS Act hnuaiah erawh nikum khan thubuai 11 ziahluh niinkumin ah a tlahniam thung a ni.

Nimin-a Crime Review Meeting neih hi Serchhip SP Gavit Gogna IPS chuan kaihruaiin Serchhip District-a Investigating Officer zawng zawng an tel a, kumin January atanga October thla thlenga thubuai an ziahluh zingah thubuai 13 te chu chhuichhuak lovin pending a nih thu tarlan a ni a, heng te hi chinfel a nih theih dan tur sawihoin, zirchianna neiin a tul angin Case I/O ten an lo bawhzui dan tur inhrilhhriat a ni bawk. He hunah hian Serchhip District-a Police te hnathawh dan leh harsatna an neih te pawh sawiho a ni bawk.