Mizoram tan Special Award

Mizoram-a Traffic Management System chungchang ah Mizoram sawrkar chuan ‘Special Award’ dawngin he Award an dawn avang hian Mizoram sawrkar chuan lawmthu a sawi a ni.

‘18th Urban Mobility India (UMI) 2025’ chu tun thla ni 7-9 chhung khan Haryana-a Gurugram ah neih a ni a, he hunah hian Mizoram sawrkar chu Mizoram Traffic Management System chung-chang ah ‘Special Award’ hlan niin Union Minister Manohar Lal leh Union Minister of State Tokhan Sahu te chuan hlanin Mizoram sawrkar aiawhin UD&PA Secretary Lalmalsawma Pachuau leh UD&PA Director Jacob Lalawmpuia bakah Town & Country Planning Officer ten an dawng a. Urban Mobility India Conference hi Ministry of Housing & Urban Affairs hnuaiah Institute of Urban Transport (India) in kumtin ah huaihawt thin a ni.

He Award dawng tur hian Award Selection Committee-in presentation nei tura a hriattir angin, Town & Country Planning Wing, UD&PA Department chuan October 16, 2025 khan Video Presentation bakah PowerPoint Presentation an pe a. Mizoram-ah Traffic Rules tha taka zawm a nih dan te, dawhthei taka traffic buai nuai nuai lova an tlan thin dan te, tul lo ah horn hmehrik a nih ngai loh dan te, Coordination Committee on Traffic Management te hmalakna te tarlan niin Aizawl chu ‘Silent City’ tia sawi thin a nih thu te tarlan a ni bawk a. He an Presentation pek zulzui hian Award Selection Committee chuan Central Ministry ah recommendation pe in Mizoram Sawrkar aiawhin UD&PA Department in an dawng a ni.

He Award hi Mizoram mipui inlung-rualna te, thuawihna te, department a thawktute thawhona bakah Mizoram Traffic Police leh Transport Department hmalakna tha tak avanga an dawn theih thu sawiin, Mizoram Sawrkar chuan lawmthu a sawi bawk a ni.