Tun thlenga kawngpui siam hna la zawh loh kawng hmangtu mipui zahlohna a nih thu sawi

MPCC Spokesperson Dr. Lallianchhunga chuan nimin khan Sakawrtuichhun tawntirh, Zihnghalkawn tanga BSF Camp bul thlenga Departmental Work-a kawngpui siam mek chu a hmunah tlawhin, May 2025 thlaa zo tawh tura ruahman ni si tun thlenga thawh zawh a la ni lo chu hriatthiam harsa a tih thu leh kawng hmangtu mipui zahlohna a nih thu a sawi.

Nimin-a helai kawng a tlawhna ah hian MPCC Spokesperson chuan Sakawrtuichhun tawntirh, Zihnghalkawn atanga BSF Camp bul thleng kawngpui siam mek hi May, 2025 thlaa zo tawh tura ruahman a nih tih April ni 12, 2025-a Aizawl West-I Bialtu MLA leh Adviser to Chief Minister ni bawk, TBC. Lalvenchhunga’n helai kawngpui siam a tlawh tuma ZPM Hqrs-in Press Release an siam ah khan tarlan a nih thu sawiin, hna pawh 60% lai thawh tawh niin an sawi niin a sawi a. Amaherawh chu, mipuite’n beiseina sang tak nena an nghah mek laiin, kumin (2025) June thla vel atang khan helai kawngpui siam hna hi chawlhsan a nih thu leh tunah hian KM 1 bawr vel chauh siam hmabak a la awm thu a sawi a, “Kum 2024 December atanga hnathawh tan tawh, KM 3.5 bawr vel lek heti khawpa rei hnathawh a ni hi mipui zahlohna a nih bakah, he hna inpek danah thil felhlel a awmzia tichiangtu a ni,” a ti.

He hna inpek dan chungchang sawiin Dr.Lalllianchhunga chuan, “An sawrkar tirhin ZPM sawrkarin helai kawng siam hna hi Restricted Tender a pek an tum a. Restricted Tender a hna inpek hi Eptu (Opposition) party an nih lai khan na takin an sawisel thin a; Pu Lianhmingthanga’n Restricted Tender a hna inpek chu ti lo hram tura tihtakzeta a ngen avangin Restricted Tender a pek an tum chu an Cancelled a. Open Tender a an tih tur thu pawh March 9, 2024 khan Assembly House-ah Chief Minister Pu Lalduhoma’n a sawi chhuak hial a ni,” a ti a. “Hetiang hi Chief Minister thutlukna nimahse, General Financial Rules leh PWD Manual bawhchhiain ZPM Block President leh ZPM PAC Member, Contractor pawh ni lo Pu Vanchunglura (Sairang) chu Departmental Work in an thawh tir leh si a ni. He lai kawng siamna senso hi nuai 300 chuang man hna a ni a, Departmental Work a inthawh tirna hna lian ber a ni hial ang,” tiin helai kawng siam ah hian sawiselna a tam em em niin a sawi bawk.