Rashtriya Poshan Maah 2025 lawmna neih a ni

Nimin khan Aizawl-a Dawrpui Multipurpose Centre-ah Rashtriya Poshan Maah 2025 lawmna neih a ni.

Directorate of AYUSH, Health and Family Welfare Department bultuma Rashtriya Poshan Maah 2025 lawmna hun hi Health and Family Welfare Department-a Principal Director leh Directorate of AYUSH-a Director Dr. Lalthlengliani chuan hmanpuiin taksa thau lutuk hi tunhma lam chuan mi hausa zawkte natna anga ngaih thin ni mah se tunah chuan mi nawlpuiah a tam ta hle tih a sawi a. Thau lutuk hian natna hrang hrang - Zunthlum, BP sang, Lung natna, Stroke leh Cancer chi hrang hrang a thlen theih avangin hriselna ti derthawngtu lian tak a nih thu a sawi a. Awlsam taka inven theih a nih thu tarlangin, ei leh in lama duhthlanna dik leh hrisel nei turin kalkhawmte a fuih bawk a ni.

Rashtriya Poshan Maah (Nutrition Month) hi kum 2018-a Prime Minister-in Ministry of Women and Child Development hnuaia alo tan tawh Poshan Abhiyan (Nutrition Mission) hnuaia hman thin a ni a. Ministry of AYUSH leh Ministry of Women and Child Development-te’n thawhhona thuthlung an ziah atangin heng Ministry pahnih te tangkawp hian chawtha chungchang mai ni lovin, mipui hrisel, ram hrisel zawk kan nih theih nana ei leh in tha leh nunphung dik pawimawhna inzirtirna atan an hmang ta a. Kumin hian thupui-ah ‘Thau lutuk tura inven nana thlum, al, leh hriak ei tlem’ tih hman a ni a. Tunlaia hriselna lama kan buaipui lian ber zinga mi, natna inkaichhawn chi ni lo (Non-Communicable Diseases) lama beihpui thlakna niin kumin hian September ni 15 atanga October ni 16 thleng hi sawrkar laipui chuan ‘Nutrition Month’ atan a puang a ni.