Khaw 122 in Thingtam vangin harsatna tawk tawh

Kumin Thingtam lo thleng a, rawthing tam vanga Sazu puang chuan Mizoram District 11-a khaw 122-a chhungkaw 3,983 thlawhhma a buh leh thlai dang a tichhe nasa hle.

Agriculture & Farmers' Welfare Director R. Lalnunzira'n Akashvani Aizawl a hrilh danin Mizoram puma buh leh thlai chinna hmun hectare 6,869.954-a hectare 1,737.354-ah Sazu puang hi an che a. Buhpui leh tharrang bakah Buhban hmunte an tichhiain buh an ei nasa a, chu bakah thlai dang - Vaimim, Fu, Behlawi, Sawhthing, Chhawhchhi, Hmarcha, Mai, Bawkbawn leh Fanghma thlengin an ei a. Sazu puanna hmuna District Agriculture Officer (DAO)-te chuan an Bial theuhah Sazu thahna hlo/Tur, Bromadiolone leh Zinc Phosphide an sem a, loneitute hnenah Tur hmanga Sazu hrai dan an zirtir a. Chu bakah Mizovin tunhma atanga Sazu manna atana an Thang hman thin Vaithang, Mangkhawng leh Thangchep te hmang uar turin an chah bawk niin a sawi.

Loneitute chu Thang an hmanin a ngai reng hmang lova Sazu-in Thang a ni tih an hriatchhuah hun awm vela hman thlakthleng thin turin zirtir an ni bawk a. Sazu Tur hmanga Sazu hrai hi awmze nei zawka kalpui a nih theih nan khaw hrang hrang VC-te chu thlawhhma zau hrang hrangah Sazu hrai beihpui thlak thin turin thu an rawn a. Agriculture & Farmers' Welfare Department hnathawkte chuan Sazu hraina tur leina atana pawisa a tam tawk lo chu an harsatna pakhat a nih thu an sawi a. Sazu puanna khaw thenkhat chu tlawhpawh hleih theih loh leh Fur avanga kawng ping tam tak a awm bawk avangin harsatna an tawk tih an sawi a. Khaw thenkhat chuan an Bialtute an hrilh tlai lutuk avangin Sazu hrai hmaa an Thlawhhma a seh zawh sakte pawh an awm niin an sawi.

District zingah chuan Serchhip District a khaw 16-a loneitu 1,084 zetin Thingtam hi an tuar a. Mamit District-ah chuan khaw awm zawng zawng 45 thlawhhma-ah Sazu a puang a, chhungkaw 769-in an tuar a. Aizawl District a khaw 14-ah chhungkaw 561 in an tuar bawk.

Mautam ang bawkin Thingtam hi kum 48 danah Mizoram-ah a lo thleng thin a. Kum 1977 kha Thingtam hnuhnung ber niin kumin hi Thingtam lo thleng leh tura hrilhlawk a ni chung leh chhiatna lo thleng tur hriat lawk theihna Pangang leh Thangnang te a puang chungin Sazu Tur mamawh tawk leina tur pawisa a awm lo chuan sawisel a hlawh hle nia thudawn a ni a. Kum 2006-2008 chhunga Mizorama Mautam rawn zirchiangtu Australian Sazu lam zirmi Kenneth Peter 'Ken' Aplin khan Sazu pa te hian eitur duhtawk an hmuh loh chuan an note ei an ching a. Mautam leh Thingtam lai chuan mautak leh rawthing rah ei tur duhtawk an neih avangin Sazu hi an pung chak ta em em a. An intam chhuah ve leh thlawhhma-ah eitur zawngin an lut tawh mai thin niin a sawi.