Aia upate zahna leh chawimawina nun kan chhawm tlan vek a pawimawh thu sawi

Social Welfare Minister Lalrinpuii chuan aia upate zahna leh chawi-mawina nun kan chhawm tlan vek a pawimawh thu a sawi.

National Programme for Health Care of the Elderly (NPHCE) leh Social Welfare Department tangkawpin khawvel huap Upa te Ni puala inkhawm nimin a Aizawl Chanmari YMA Hall-a an buatsaih a hmanpuina ah Social Welfare Minister Lalrinpuii chuan khawtlang tana kum upate an hlutna sawiin, aia upate zahna leh chawimawina nun kan chhawm tlan vek a pawimawh thu a sawi a. Sawrkar pawhin kum upate a ngaipawimawh thu leh kawng hrang hranga hma a laksak dan te sawiin, Sawrkar laipui thupek angin District Hospital tinah Geriatric Bed (kum upate mutna tur khum) sawm (10) dah tura tih a nih angin ruahmanna siam a nih thu a sawi a. Old Age pension chungchangah pek tlai avanga harsatna awm sawifiahin, State sawrkarin a tih tur chin ti mah se sawrkar laipui atanga dawn a tlai thu leh, Old Age Pension chauh ni lo, Scheme dang hrang hrang nen a hlawm a lo kal a nih avangin a ruala pekchhuah theih hun nghah a tul thu a sawi a ni.

Minister Lalrinpuii chuan khawvel pumpuia upa te an pun chhoh zel thu sawiin, hei hian damdawi lama inenkawlna tha zawk mamawhna a thlen tel thu a sawi a. Chumi atan chuan Mizoram Universal Healthcare Scheme hnuaiah ruahmanna tha tak siam a nih thu leh Private mai bakah Kohhran Hospital hrang hrangin an zawm belh mek thu a sawi a. Kum upa Golden Card nei te chuan sawrkar Hospital-ah chauh hman theih thin kha tunah chuan MUHCS zawmtu Private Hospital-ah chuan a hman theih vek tawh thu a sawi a. Kum upate tana hmalakna hrang hrang zingah MUP Multipurpose Centre sak mek te, Recreation Centre dinna tura hmalak mek a nih thu te, kum upate enkawlna hmun Ainawn Veng a siam mai bakah District hrang hrang siam tura hmalak mek a nih dan te a sawi a. National Health Mission hnuaia NPHCE chuan SWD nen tangkawpin District hrang hranga Physiotherapy Camp te buatsaihin Campaign vawi tam tak buatsaih a lo ni tawh thin thu a sawi bawk.

He inkhawm hi Social Welfare Director Lalzarmawii chuan kaihruaiin khawtlang a kum upate tangkaina leh pawimawhna te a sawi a. Dr. Eric Zomawia hnen atangin kum upate tana inenkawl dan tha ngaihthlak niin, MUP President Nghaklianmawia leh MHIP President Lalliani te pawhin thu an sawi a. Khuallian hian Kum 100 tling mipa 3 leh hmeichhia 9 hnenah lawmpuina thilpek a hlan a ni.

December 14, 1990-a United Nations General Assembly chuan October 1 hi ‘International Day of Older People’ atan hman relin kum 1991 atang khan he ni hi hman a ni ta a ni.