Chief Minister in Hulhliap SSC tlawhin tun hun tluka hun tha a awm loh thu a sawi

Chief Minister Lalduhoma chuan nimin khan Synod Camping Centre, Neihbawia-a kalpui Hulhhliap Short Stay Centre (SSC) chu tlawhin, “Hetiang taka ruihhlo ngaite enkawlna kalpui hi a dang sawi tur a vang viau mai thei. A sim duh tak takte tan chuan tun hun tluka hun tha hi a awm lo a ni,” a ti.

Mizoram sawrkar-in PPP Mode-a Synod Camping Centre, Neihbawi-a a kalpui Hulhhliap Short Stay Centre (SSC) a tlawhna ah hian Chief Minister Lalduhoma chuan kan ramah ruihhlo vanga harsatna tawk kan tam avangin sawrkar chuan tun leh tuna kan mamawh ber nia ngaiin ‘Hulhhliap Short Stay Centre’ kalpui thain a hria tih sawiin, “Sawrkar in amah maia a tih theih loh avangin YMA/MHIP leh Synod te chu phungbawma sawmin PPP Mode-in a kalpui ta a ni,” a ti a. “Ruihhlo ngaite chu an nghei theih nan kan tanpui a ni satliah lova, a nghei hlen ten eizawnna an neih theihna turin Skill Training changkang tak kan pe nghal a. Hetiang taka ruihhlo ngaite enkawlna kalpui hi a dang sawi tur a vang viau mai thei. A sim duh tak takte tan chuan tun hun tluka hun tha hi a awm lo a ni,” a ti.

Chief Minister chuan ruihhlo do chungchang pawh sawiin, “Supply lam danchah tumin hma kan la nasa thin a, a man pawh kan man nasa a, a Sangha lian pawh kan man zauh zauh tawh a ni. Tunah hian ramdang atanga a rawn luhnate danchah tumin ‘Operation Jeriko’ kan kalpui leh mek. Tin, Security Coordination Committee kan din a, kan rama Security Agent hrang hrangte kan thukhawm a, hma kan la ho a, kan thawhhona a tha hle ni. Ruihhlo la ti ve lo, thangtharte hnenah pawh drugs that lohzia uar takin zirtir a ni a, Nasha Mukt Bharat Abhiyan hmangin District tinah Campaign neih a ni. Ruihhlo bawih-a tan hauh loh dan chu ‘tihchhin miah loh’ a ni a, thangtharte hnenah i hrilh mawlh mawlh ang u,” a ti bawk.

Chief Minister chuan Hulhhliapa thawktute chungah lawmthu sawiin, Damlo enkawl mekte chu sim tumna tak tak nei tura a fuih bakah helai hmun an chhuahsan hnuah thlemna tam tak an hmachhawn dawn tih hrilhin, chung te chu hnar ngam turin a chah nghal bawk a ni.

Hulhhliah SSC hi tum khata mi 150 zel enkawl theihna tura duan ni mahse diltu an tam avangin Batch hmasa berah mi 256, Batch hnihna ah mi 544 leh Batch thumna, tuna kalpui mekah mi 208 admit an ni a. Batch khat hi ni 20 chhung zel niin a tir lam ni 10 chhung Detoxification kalpui a ni a, a dawt ni 5 chhung chu rilru lam enkawlna (Psychological Counseling) atan hman niin a bak ni 5 chu Synod Revival Department bultumin Camping neihzui thin a ni. An chhuah hnuah Referral Task Group ten thla thum (3) chhung an thlithlai zui a, ruihhlo laka fihlim zuite tan Skill Training kalpui leh a ni.

Skill Training-ah hian Food Processing ah mi 11 an training chhuak tawh a, Training hi a taka tihchhin (practical) nena kalpui zel a ni a. Electrical Technician chu mi 28 in an zir mek a, Aluminium Fabrication pawh mi 18 in an training mek bawk. National Skills Qualification Framework (NSQF) Government of India in a duan ang thlapin training hi pek an ni a. Mizoram Council for Vocational Training hminga Certificate pek vek tum a ni.

Hulhhliap Short Stay Centre kalpui nan hian sawrkar chuan cheng nuai 108 a pe a. Batch 4-na hi September thla hian neih leh tum niin a tul anga kalpui chhoh zel tur a ni ang. Batch hmasa ber leh a dawttu-a lutte an chhuizuina ah nimin thlengin zaa sawmsarih leh pali (74%) te chu ruihhlo lakah an fihlim zui zel tih hmuhchhuah a ni bawk.

He hun hi Hulhhliap SSC Core Committee Chairman Malsawmzuala Ralte chuan kaihruaiin Health Minister Lalrinpuii pawhin thu a sawi bakah Dr. Lalhriatzuali Ralte, Member Secretary, Core Committee chuan Report a pe bawk a ni.