Dampa Bial-a by-election neih turah Party pathum ten Candidate an puang ta

Mizoram-a Political party pathum te chuan Dampa Bial-a Assembly by-election lo awm tura an Candidate tur an puang ta a, Congress Party chuan Minister hlui John Rotluangliana chu an Candidate tur a nih thu nimin khan an puang a ni.

Mizoram Pradesh Congress Committee (MPCC) hian nimin khan Aizawl-a Congress Bhavan-ah Dampa Bial-a Assembly by-election lo awm turah an Party Vice President leh Minister hlui, John Rotluangliana chu an Candidate tur a nih thu an puang a, he hunah hian MPCC President Lal Thanzara chuan, “Pu John Rotluangliana hi kan Vice President thar a ni a, MNF in an rawng huai an ser a, keini pawn Vice President kan ser ve dawn a ni. Kum 1983 khan Dampa Bial hi Phuldungsei Bial tih anih lai, PC Sawrkar laiin by-election ah Congress party candidate Pu Liansuama chu thlantlin a ni tawh a, a kum leh 1984 ah General Election a awm a, Congress party chuan seat 30 awmah seat 20 lain kan lo sawrkar tawh a ni. Tun tumah pawh hian kan candidate hi Pathianin Congress min kaithawh lehna hmanrua anih kan beisei a, kan tawngtaina a ni. Pu John Rotluangliana hi Dampa lama kan Congress hruaitute duh rawn, an lungrualna em em a ni a, ani kan Candidate tur hi kan lawm em em a ni,” a ti.

Dampa Bialtu MLA Lalrintluanga Sailo chu kumin July 21 zan khan a boral a, hei vang hian Dampa Bial-ah hian Assembly by-election neih a ngai dawn niin a lang a, Rorellai ZPM Party chuan August 25 khan he Bial-a by-election lo awm turah hian Vanlalsailova chu an candidate atan ruat a nih thu an lo puang tawh a. Eptu Party lian ber MNF party pawhin September 3 khan an Party Sr. Vice President leh Minister hlui, Dr. R. Lalthangliana chu an Candidate tur a nih thu an lo puang tawh bawk a. Nimin lama Congress party in an Candidate tur an puan leh takah chuan Mizoram-a party lian pathum te chuan an Candidate tur an puang chiang ta a. BJP Party pawhin an Candidate tur hi an tifel tawh tih an President, Dr. K. Beichhua chuan tunhnai khan thuthar lakhawmtute zawhna chhangin a lo sawi tawh a, tunah hian an Candidate tur hi BJP National pawmpuina an nghah mek thu leh tunkar ah hian an hotute hi Aizawl-ah rawn kalin an sawiho hnuah Candidate tur hi an tifel dawn niin a sawi a ni.

Dampa Bial-a Assembly by-election neih tur atan hian Electoral Roll ennawn hna chu kalpui mek a ni a, tun thla ni 2 khan Draft Electoral Roll chu tlangzarhin tun thla ni 17 thlengin hming thun thar, paih leh siamthat ngai te tan dilna thehluh theih niin September 30 khian Final Electoral Roll tarchhuah a ni dawn a. He Bial-ah hian Polling Station 41 awmin Draft Electoral Roll-ah hian vote nei mipa 10,425 leh hmeichhia 9980, an vaiin 20,405 an awm a ni.