SWD Minister in Tanhril-a State Braille Press a tlawh

Social Welfare, Women and Child Development Minister Lalrinpuii chuan nimin khan State Braille Press tlawhin Training Centre for Specially-Abled Persons, Tanhril pawh a tlawh bawk.

Pianphunga rualbanlo (Specially-Abled Persons) te tana buatsaih ‘Training Centre for Specially-Abled Persons, Tanhril’ leh he Centre hnuaia State Braille Press a tlawhna ah hian Minister Lalrinpuii chuan rualbanlo zirlaite fuihna thu sawiin, rinawmna leh dikna nena nung turin a chah a, thawhrimna nen, Pathian hre reng turin a chah bawk. Minister in a tlawh Specially-Abled Training Centre, Tanhril-ah hian Mitdel hawrawp print theihna khawl, State Braille Press bun a ni tawh a, mitdelte hman tur Zirlaibu, Ballot Paper leh thil dangte print thin niin tunah hian Class 9 atanga 12 zirlaibu te print mek a ni a, ramdang pan buai ngai tawh lovin mimal leh sawrkar tan dawr theih reng an ni.

Training Centre for Specially-Abled Persons hi kum 1981 khan ‘Handicapped Training Centre’ tiin Laipuitlang-ah din a ni a, kum 2017 khan ‘Training Centre for Specially-Abled Persons’ tia hming thlak niin kumin April thla khan Tanhril-ah sawn a ni a. Puanthui zirna seat 30 awmin, thla 8 chhung training neihpui thin an ni. Training Centre hi a hmuna riahchilh theih (residential) niin riahchilh lova kalte chu an training chhungin thla tin stipend Rs. 700/- pek thin an ni a, training an zawh hnuin puanthuina khawl leh khawl dang an mamawhte pek thin an ni bawk.

Tun dinhmunah Mizoram-ah Specially-Abled te tan hian Training Centre hmun 4 - Tanhril, Thakthing Dam Veng, Chaltlang leh Lunglei-ah te din a ni tawh a, heng Centre-ah te hian Trade hrang hrang zir theih niin training Centre atang hian mi 1992 vel zirchhuak an awm tawh a ni. Social Welfare Department hmasawn nan leh hnathawktu indaihlohna phuhru tur hian District Social Welfare Officer (DSWO) pahnih leh Field Facilitator (FF) post 3 lakna tur buaipui mek a ni bawk.