Larsap in TB awm lohna State hmasa bera ni tura theihtawp chhuahpuiah Mizo mipuite a sawm

Mizoram Larsap General (Dr) Vijay Kumar Singh chuan Mizoram chu India rama TB awm lohna State hmasa bera siam thei tura theihtawp chhuahpuiah Mizo mipuite a sawm.

Nimin khan Raj Bhavan-ah Pradhan Mantri TB Mukt Bharat Abhiyaan programme hman a ni a, he hunah hian Larsap General (Dr) Vijay Kumar Singh chuan India-in kum 2025 chhung ngeia TB awm lohna ram nih a tum thu leh hei hi khawvel pum target, kum 2030 aia kum 5 laia hma a nih thu sawiin, kumin 2025-ah kum chanve kan pelh tawh avangin kumin chhung ngeiin theihtawp tak meuh meuh kan chhuah tlan a tul thu a sawi a, Health Department mai ni lo, kan zavaia tanrual a tul thu sawiin, tunhna zawng aiin TB natna chu hriatchian a nih tawh thu leh hmanrua leh damdawi awlsam taka a awm tawh avangin India ram atanga TB nuai bo tura ngawrh lehzuala tanlak a tul thu a sawi bawk.

Larsap chuan Mizorama TB vei enkawl mek mi 1,501 zinga 117 te chauhin Food Basket Support kaltlanga eitur tha an dawng leh a tam zawkin an la dawng lo chu veiawm a tih thu sawiin, Food Basket hmalakna a thlawp zia lantir nan TB vei mi 10 te tana eitur tha pek a tum thu a puang a. NGO, Kohhran leh he hmalakna thlawptu zawng zawngte chu TB veite'n eitur hrisel an dawn kim vek theih nana theihtawp chhuah turin a sawm a. Mizoram chu India rama TB awm lohna State hmasa bera siam thei tura theihtawp chhuahpuiah Mizo mipuite a sawm a ni.

He hunah hian Health Minister Lalrinpuii chuan TB do kawngah Sawrkarin theihtawp a chhuah mek zel thu leh Damdawi In hrang hrangte pawh thuamchak mek zel a nih thu sawiin, TB test leh damdawi man a thlawn veka kalpui a nih bakah ei tur tha leina tur Rs 1,000/- account-ah thun thin a nih thu a sawi a. TB chungchang inzirtir tam zawk neih a tul thu sawiin, TB chu thuawihna leh tanrualna hmanga hneh theih a nih thu a sawi bawk.

Nimin-a he hun hman ah hian Food Basket Support kaltlanga TB veite eitur tha pek kawnga thawh hlawk tak Nikshay Mitra pahnih - NEDFi leh Dr. Laxmi Narayan te hnenah Larsap-in chawimawina a hlan a. TB vei mi 4 te hnenah Food Basket hlan a nih bakah NEDFi in TB vei mi 100 te Food Basket Support kaltlanga an chhawmdawlna tur Rs 4,90,000/- cheque chu TB veite aiawhin Larsap chuan a dawn sak nghal bawk.

He huna tarlan nih danin Mizoram-ah TB vei enkawl mi 1,501 awm mekin heng zinga 117 te hian Food Basket chhawmdawlna an dawng a, hei hi 7.8% a ni. Nikshay Mitra 76 awm mekin TB vei zinga 32.5% te chu taksa mamawh chaw tha dawng lo ni a chhut a ni. India ram State/UT te TB Score siamah Mizoram in point 68 hmuin 12-na dinhmun a hauh a, a hlawhtlinna rate hi 79.50% niin, TB vei zinga 5% velin an thihpui anga chhut a ni a. Kum 2024 khan TB vei 2,306 awmin thihpui mi 136 an awm a ni.