LENKAWL kum 44-na a thleng ta

August 14, 1981-a tihchhuah tan LENKAWL Serchhip Nitin Chanchinbu chuan Vawiin August 14, 2025 hian kum 44 tlingin kum 45-na kan lo hmang ve tan dawn ta a. Kum 44 chhung zet harsatna hrang hrang karah tluang taka kan khawtlang, ram leh Hnam leh Pathian tana kan rawngbawlna hlenchhuak tura Pathian in min kaihhruaina ah a tharin lawmthu kan sawi a. He kum 44 chhunga tlawmngai-a LENKAWL chhiar thin te, thuchhuah tur tha tak tak min pe thintu te leh he Chanchinbu tihchhuahna kawnga tha leh zung lo seng tawh te zawng zawng chungah a tharin lawmthu kan sawi leh bawk a ni.

Tunlai khawvel hmasawnna thang chho zelah Social Media in nasa takin hma a sawn ve zel a, kan rama Print Media lian tak tak te pawhin harsatna tawk mekin keini ngei pawh hian kawng hrang hrangah harsatna kan tawk ve mek bawk a. Amaherawh chu mipuite duhsakna nasa tak dawngin chung harsatna karah pawh chuan ke kan la pen ve zel a ni a, mipuite hnena thuthar dik leh rintlak thehdarhna turin kan Chanchinbu phek mai bakah Social Media lama kan hmun neih te pawh tangkai taka hman chhoh zel kan la tum dawn a ni.

Kan sawi fo tawh thin angin, he kan Chinchinbu hi Serchhip khaw hmasawnna atan kawng engemaw ah tal tangkaina a neih ve theih beisei avang te leh mipui, a mamawh apiang ten tangkai taka an hman theih tura tihchhuah a ni a. Hei vang hian mipuite pawh neitu chan chang taka in thawhpuina leh in tawiawmna kan mamawh a. Serchhip khua leh a District mai bakah a mipuite pawhin hma kan sawn zel theihna tura tangkai taka rawn hmang zel turin kan sawm thar leh che u a ni.