Kumdang-ah kawng chhia a awm tawh loh beisei

Adviser to CM (Finance) TBC. Lalvenchhunga’n Mizoram chak lakluhna kawng chhia ah ZPM chuan mawhphurhna la in, siamthat a nih theih nan theihtawp a chhuah mek tih sawiin, kumdangah chuan hetiang hi a thlen tawh loh an beisei tih a sawi.

Akashvani Aizawl zawhna chhangin Advisor to CM (Finance) leh Aizawl West-I Bialtu MLA TBC. Lalvenchhunga chuan kawngchhiat chhan chu mawhphurhna inchuh vang a ni tih mipuiten an hre tlang vek tawh tih sawiin, kawng chhia chu Mizoram in a tawrh tak avangin Mizoram sawrkar chuan a enkawl kawng ni tawh lo mah se theihtawpin hma a la a, Chief Minister Lalduhoma pawhin a siamthat theih nan sum a sanction a, PWD Minister hovin a Department chuan a hmunah an riahchilh a, siam tha turin theihtawp an chhuah mek tih a sawi a. Lirthei Ke 14/16 tih loh chu lirthei tang an awm mumal lova, harsatna lian tak a awm tawh lo an beisei tih a sawi.

TBC Lalvenchhunga chuan lirtheia eizawng ten sawrkar an thawhpui tha a, kawng siam a nih theih nan lirthei tlan loh an remti chu lawmawm a tih thu a sawi a, lirthei tlan chawlh chhung hian kawng chu tha taka siam hman a nih a beisei tih sawiin, ZPM chuan mipui tan theihtawp a chhuah a, mawhphurhna pawh midanga beng per lovin, siamthat a nih theih nan theihtawpin Contractor te a thawhpui mek a, kumdangah chuan hetiang hi a thlen tawh loh an beisei tih a sawi a. Zawhna chhangin Thal laiin kawng siam lo tawp an ni lo tih pawh sawiin, kumin January thla ah NHIDCL enkawl tura tih ni mah se kawng an siam nghal loh avangin Mizoram sawrkar chuan theihtawpin a thawm tha a, tuna lirthei tanna lai ber Mega Food Park phei chu an metal vek a, duhthu a sam lo deuh a, Fur a lo thlenin bungraw rit tak tak phur lirthei lo lut te chu kawng chuan a dawl zo lo niin a sawi a, tunah cheng vbc. 50 in an engemawchen chu an siamthat theih tawh a beisei tih a sawi bawk.

Hetihlai hian Eptu party te chuan sawrkar inthlahdah avanga Mizoram chak lakluhna kawngpui chhia chu Mizoram ei leh bar zawnna kawngah pawh a pawi hle tih sawiin, thla 7 chhungin GST pawh a tlahniam zawngin a la kal char char tih an sawi a. MNF Publicity Board-a Vice Chairman J. Malsawmzuala Vanchhawng chuan Akashvani News Aizawl zawhna chhangin tuna kawng chhe zual, lirthei tam tak a tan vanga mipuiin harsatna namen lo an tawhna chhan lian ber Kawnpui - New Khamrang chu nikum lamah pawh mipuiten harsatna nasa taka an tawrh chhan a lo ni tawh tih a sawi a. Congress Party Treasurer Dr. Lalmalsawma Nghaka pawhin tunlai kawngchhia chu sumdawngte bakah lirtheia eizawng leh mipui nawlpuiin an tuar tawh hle nia sawiin, Mizoram sawrkar chuan Thal lai khan kawngpui pawimawh chu ngaihtuah nise tun ang hian kan buai a rin lo thu a sawi bawk.