Aizawl-ah ‘Pineapple Bonanza’ neih tan leh a ni

Nimin zing khan ‘Pineapple Bonanz’ chu a tum 4-na atan Aizawl-a Millenium Centre kawt-ah neih leh a ni a, he hun hi Agriculture Minister PC. Vanlalruata chuan hmanpuiin Organic hlutna nasa taka inhrilhhriat a la tul thu a sawi.

Mizoram chhunga Organic hmanga Lakhuihthei tharchhuah man tlawm zawka leitheihna tura Provider - Mission Organic Value Chain Development for North Eastern Region (MOVCD-NER)-in a huaihawt 'Pineapple Bonanza' tum lina hawnna hunah hian Agriculture Minister PC. Vanlalruata chuan khawvel in Organic Pineapple Mizoramin a thar ve a ni tih hriat nana an service provider tha tak 'Clover' ten hetiang hun an buatsaih thin chu lawmawma a tih thu a sawi a, hlo tur chi reng reng chu hmang tlem tial tial turin Zoram Kuthnathawktu te a chah bawk.

Pineapple Bonanza tum lina hi August ni 6-9, 2025 chhung awh tura buatsaih a ni a, Khawzawl leh Serchhip District hnuaia Organic FPC ni tura hma la lai mek Raifan Organic FPC leh Tuikum Organic FPC te tharchhuah chu he hunah hian zawrhchhuah a ni. Lakhuihthei chingtute hi MOVCD- NER scheme Phase IV hnuaia loneitu inziaklutte ta a ni a, heng loneitute hi Khawzawl leh Serchhip District-a Raifan leh Tuikum Organic FPC te hnuaia intelkhawm niin Mission Organic Mizoram (MOM), State Leading Agency leh Clover Organic Pvt. Ltd. Service Provider te enkawl lai mek an ni.