Dan lova nungcha tawlhruk Mizoram-ah man tam tawh

Environment Forest and Climate Change (EF&CC) Department hnuaia Wildlife Division chhinchhiah danin, Mizoram-a dan lova ramsa leh Sava tawlhruk man zat chu 1103 a tling tawh.

EF&CC Wildlife Division hotuten Akashvani Aizawl an hrilh danin, Mizoram-a ramsa tawlhruk chi hrang hrang man tawh 1103 te hi Assam Rifles, Border Security Force, Directorate of Revenue Intelligence-te bakah Custom Department leh Mizoram Police-te leh Central YMA Anti-Drug Squad ten an man a ni a, a tlangpuiin Burma lam atanga lo kal a ni a. Dan lova nungcha tawlhruk an man zingah hian Laiking a tam ber a, Laiking chi hrang hrang 500 chuang man a ni a. Heng bakah hian Sava chi hrang hrang, Satel leh Rul chi tam tak bakah Awle thlenga dan lova tawlhruk a nih thin thu an sawi bawk.

Wildlife Division hotute chuan heng nungcha dan lova tawhru thin te hian an nungcha tawlhruk thin te chu bawm tawt tak takah te leh boruak luh theih mang lohna ah te riltam tak leh dang char taka an dah thin thu sawiin, thuneitu lamin an hnena an rawn dah nungcha tam tak chu chhan hman lova an thih thin thu an sawi bawk.

Wildlife Division-te hian dan lova nungcha tawlhruk thuneituten a anmahni hnena an rawn dah bakah hian Mizoram chhunga awmsa nungcha mihringte chenna hnaih lutuk a awm laksawn hna te leh nungcha hliam tuar, mihringte chhar enkawl hna an theihtawp chhuahin an thawk thin a, kum 2020 June thla atanga nimin thleng khan Mizoram chhunga nungcha hliam tuar leh an awmna him loh avanga an laksawn tak chuan 116 an tling tawh bawk a ni.

EF&CC Wildlife Division hotute sawi danin tunlai hian mihringte chenna In leh a chhehvel ah Rul a inlar nasa hle a, Rul senghawi hna hi nitin deuhthaw Rul lam tui mi inzawmkhawm, Zo herbs te nen an thawk thin a ni.