Mipui tan MUHCS thar hlawhtling taka kalpui ngei an duh thu Adviser to Chief Minister in a sawi
Sawrkar chuan Mizoram Universal Health Care Scheme thar chu mipui tan hlawhtling taka kalpui ngei a duh takzet tih Adviser to Chief Minister TBC. Lalvenchhunga chuan sawiin, Private Hospital-te nen tangruala mipui tan theih tawpa thawhho an duh thu a sawi.
Nimin khan ZPM Party chuan Aizawl-a an Office-ah Chhung Inkhawm neiin he hunah hian Adviser to Chief Minister TBC. Lalvenchhunga chuan Mizoram Univershal Health Care Scheme chungchang hi sawiin, Sawrkar hamasa hun lai anga cheng vbc. 20 vel daha Health Care kalpui ve tawp leh a hnua leiba tlingkhawm ang kha pumpelh an duh tih a sawi a. “Sawrkar hmasa khan ‘kan Private Hospital te hian Pakage rate hmang ve tawh se’ tiin a nawr a, an innawr tlu tep tihah a tlawm san leh ta si a, chuvang chuan Private Hospital rate hmangin MR bill a kal angai thin a, re-imburse theite rate chu a dang deuh bik ni te pawhin a lang thin,” a ti a. Chuvangin Sawrkar chuan Standard Pakage rate duan tha a tih thu sawiin, “Mizoram-ah kan Private Hospital ten theihtawp an chhuah a, investment an hmang tih Sawrkarin a hriatpuii avangin duhsak takin Delhi leh Mumbai a Hospital thate nen rate inangin a siam sak vek a, chumai bakah Sawrkar chuan nuai 50 thleng dahkham a inhuam a ni,” a ti a. Private Hospital te hnenah pawh an harsatna te Sawrkar nen sawiho tura sawm nimahsela Vawiin thlengin a chhanna an dawng lo chu mak an tih thu a sawi a. “Sawrkar chuan kan Private Hospital-te nen tangruala mipui tan theihtawpa thawhho kan duh a, ruahmanna famkimlo awmte pawh sawiho kan inhuam reng a, Sawrkar chuan Mizoram Universal Health Care Scheme thar hi mipui tan hlawhtling taka kalpui ngei hi a duh takzet a ni,” a ti bawk.
Adviser to CM chuan Kalphung thar mipui Sawrkar chu khawsak harsa zawkte tana ding a ni tih sawiin, khawsak harsa te tan buhfai man tihsan a nih loh thu te, Electric leh Tui Bill an la tihsan loh thu leh Kawng leh Lei thawmthatna tur sum dah tipungin, Sawhthing pawh theihtawpa an lei thu a sawi bawk a ni.