Lung tla leh leimin vangin kumin ah mi 4 boral tawh

Kumin 2025 chhungin Mizoram-ah lung tla leh leimin chhilh avanga boral mi 4 an awm tawh a, sawrkar chuan heng nunna chan te hi cheng nuai 4 theuhin a ral a ni.

Disaster Management and Rehabilitation Department chhinchhiah danin, kumin thla 4 chhungin Mizoram chhungah lung tla leh leimin in a chhilh vanga nunna chan hi mi pali tling tawhin heng zinga pathum te hi tunhnaia Lengpui panna kawnga lung tla in a delh te kha an ni a. Nikum chhung khan leimin vangin Mizoram-ah mi 36 laiin nunna an lo chân tawh thung a ni. Disaster Management and Rehabilitation Department Director R Vanrengpuia'n Doordarshan a hrilh danin, leimin laka invenna atan ruahmanna siam a ni a, National Lanslide Risk Mitigation programme hnuaiah tun dinhmun ah Project Pre Feasibility Report siam chu peihfel tawh niin, Ngaizel kham lung tla thin venna tur, Slope Stability leh Concrete sak leh chhiatna laka venhimna hrang hrang siamna tur in hmalak mek a ni, a ti.

Hetih mek lai hian nimin khan Aizawl District Magistrate thupek angin Aizawl District Disaster Management Authority hnuaia Quick response Team te leh PWD tangdun chuan Aizawl Ngaizel kawng chhak lung leh lei tlak hlauhawm te thenfai hna an thawk a ni.